DEN HAAG – Entrenadó di ekipo Hensley Meulens ta konta ku mas estrea di Liga Mayó Merikano, MLB, pa World Baseball Classic na luna di mart. Entre otro Xander Bogaerts i Kenley Jansen, ku a kambia di ekipo den MLB e wenter aki, a haña pèrmit di nan doño di trabou nobo pa partisipá na World Baseball Classic.

Bogaerts di 30 aña a bandoná aña pasá Boston Red Sox, ku el a gana dos título di Serinan Mundial kuné. E Rubiano a firma un kontrakt di djesun aña pa 280 mion dòler ku San Diego Padres.

Jansen, e picher di 35 aña a sali di Atlanta Braves bai Red Sox. E picher di Kòrsou a firma un kontrakt di dos aña na balor di 32 mion dòler na Boston.

World Baseball Classic

World Baseball Classic ta e úniko torneo kaminda hungadónan estelar di e kontrikantenan Merikano por partisipá.

Na komienso di e luna aki Meulens a anunsiá un selekshon temporal di sinkuenta hungadó. Pa mas tardá 7 di febrüari e mester entregá e organisashon un lista definitivo di trinta hungadó. Meulens ta spera di por  inkluí Marrison “Diddy” Gregorius, Andrelton Simmons i Jorickson Brovar tambe. 

20 pais ta partisipá den e World Baseball Classic, dividí den 4 grupo. E ekipo nashonal di Reino Hulandes ta kuminsá den grupo A kontra Cuba, Panama, Taiwan i Italië. Hulanda a yega semi-final na World Baseball Classic na 2013 i 2017 bou di guia di Meulens. 

Meulens komo anterior hungadó profeshonal di beisbòl ta spera di gana e World Baseball Classic. “Nos ta bai e torneo pa gana”, segun Meulens.