DEN HAAG – “World Baseball Classic ta e torneo di beisbòl mas grandi di mundu. Esei ta pasobra hungadónan di Liga Mayó ta partisipá, e mihó hungadónan di mundu.” E wowonan di e entrenadó di ekipo di Reino Hulandes ta bria: “I nos tin  algun”, e ta bisa NOS.

Esun ku tende Hensley Meulens papia, no ta pensa mésora riba un hòmber ku ta duna guia na un grupo di multimionario. E Yu di Kòrsou di 55 aña ta humilde, pero kada palabra ta na su lugá. No ta pòrnada su nòmber di kariño ta Bam Bam. E ta debe e nòmber ei na e temporado ku e mes tabata bati e balanan te den tribuna pa entre otro New York Yankees.

Reino

Pa Meulens ta un ‘honor pa sali pa e pais madre’. Pero pa grandi ku e tradishon di beisbòl Hulandes ta, e éksitonan riba e nivelnan mas haltu ta debí prinsipalmente na e talentonan kasi sin límite di e área di Karibe. P’esei riba nan ünifòrm tin pará Kingdom of the Netherlands.

Ora e estreanan di Liga Mayó di Aruba i Korsou partisipá, e tim di reino ta pertenesé na e mihó timnan di mundu. No ta pòrnada Oranje tabata den semi final di World Baseball Classic na 2013 i 2017.

“Ku eksepshon di Ozzie Albies tur nos estreanan t’ei: Xander Bogaerts, Kenley Jansen, Jurickson Profar, Andrelton Simmons, Jonathan Schoop, Didi Gregorius, Chadwick Tromp. Último biaha tambe nan a partispá, pues no ta un sorpresa pa nos”, Meulens ta bisa.

Hulanda ta hunga su partido di grupo den grupo A na Taichung, Taiwan

djarason 8 di mart, 00.00 ‘or (ora di Kòrsou): Cuba – Hulanda

djaweps  9 di mart, 00.00 ‘or (ora di Kòrsou): Panama – Hulanda

djasabra 11 di mart, 06.00 ‘or (ora di Kòrsou): Hulanda – Taiwan

djadumingu 12 di mart, 07.00 ‘or (ora di Kòrsou): Hulanda – Italia

E dos paisnan ku sali mihó ta posishoná nan mes pa kuart final na Tokio riba 15 i 16 di mart.

E ganadónan di kuart final ta biaha pa Florida, kaminda e kuater mihó paisnan ta bai bringa pa e viktoria final riba 21 di mart.

“Nos ta bai pa e final”, Meulens ta bisa NOS desidido. “Esaki ta mi di tres biaha i esaki ta un di e selekshonnan di mas talentoso. E último dos biahanan nos a yega final, awor nos ke gana e torneo. Nos por.”

World Baseball Classic

World Baseball Classic ta un inisiativa di Mayor League Baseball i ta úniko pasobra ta solamente na e torneo aki hungadónan profeshonal di kompetensia profeshonal di Nort-Amérika ta partisipá.