KRALENDIJK – Biblioteka Públiko di Boneiru, aktualmente nan ta instalando un sistema nobo pa fiamentu di buki. E sistema bieu di Koha lo keda remplasá ofisialmente pa e sistema nobo di Wise for di 26 di yüni 2023. 

Wise tin hopi bentaha, manera e posibilidat pa wak e kolekshon di buki via e wèpsait. Tambe miembronan di biblioteka por reservá i prolongá bukinan for di kas.

Durante hinter luna di yüni, personal di biblioteka ta trahando huntu ku un tim di Hulanda for di Online Computer Library Center (OCLC) pa instalá i usa e sistema nobo di Wise. Durante e periodo aki, personal ta risibí entrenamentu den e sistema nobo i ta introduí manualmente henter e kolekshon di buki.

Pa motibu di e trabou hopi grandi ku mester ser hasi den un periodo kòrtiku, biblioteka lo ta será for di djamars 20 te ku dia 26 di yüni despues di mèrdia. For di 1 ‘or di atardi riba 26 di yüni, miembronan di biblioteka por bishitá pa buská nan tarheta nobo di biblioteka i duna un bista rondonan.

Miembresia

Te ku e edat di 18 aña, miembresia na biblioteka ta kompletamente grátis. Pa adultonan, un miembresia ta kosta solamente 6 dòler pa aña. Pa mas informashon, for di 26 di yüni, por bishitá biblioteka na Kaya Gramèl òf yama na number 715-5344.