KRALENDIJK – Tourism Corporation Bonaire (TCB), den kolaborashon ku
Guardian Group Fatum, ku orguyo ta anunsiá ku a selektá e promé dos kandidatonan pa
e Bonaire Tourism Scholarship Program i ku a honra nan ku nan Scholarship Award.
Hensmier Jeomar Arrindell i Elise Arrindell-Weerstand ta kuminsá ámbos ku un biahe
kulinario inspirativo pa Bulgaria, ku komo meta pa mehorá nan abilidatnan kulinario.

Ku un vishon pa krea platonan inolvidabel ku ta un muestra di honor na nos tradishonnan
boneriano, e shèfkòk boneriano Hensmier ta trata na hisa e arte di kushinamentu na nos
isla na un nivel mas haltu di kome dushi. Den un karta den kua e ta ekspresá su pashon i
ambishon, Hensmier ta konta tokante su dedikashon pa representá Boneiru den kada
plato ku e ta sirbi su wéspetnan. “Mi lo tin gana di amplia mi horizonte i konosementu pa
prepará un kuminda inolvidabel pa kada bishitante i pa ta un embahador pa mundu
kulinario di Boneiru.”

Ora ku Hensmier no ta trahando na Ocean Oasis, e ta dediká su tempu na dunamentu di
lès na mucha na Nature Cooking School. Ku un sinsero deseo pa sòru pa un impakto
positivo, e ta siña nan e abilidatnan esensial pa loke ta trata kultivá, kosechá i prepará
nan propio kuminda. “Pa medio di hasi un biahe asina’ki nos ta laga nos hóbennan mira e
posibilidatnan di nos tremendo industria i di nos isla. Mi a kuminsá komo labadó di tayó i
awor akí mi ta shèfkòk na un di e mihó restorantnan di nos isla. Esaki nunka lo no a pasa
si ningun hende no a duna mi e oportunidat akí pa kuminsá ku kushinamentu,” segun
Hensmier.

Komo doño di Sweeti Bakery turismo ta di gran importansia pa Elise. Sinembargo e ta
kere ku esaki no ta solamente krusial pa e mes, pero pa henter nos isla. Edukashon i
desaroyo personal ta balornan núkleo ku ta sumamente importante pa Elise. “Den mi
pasteleria mi ta ofresé studiantenan di diferente nivel un lugá pa nan siña i mi ta duna
tayer na detenidonan i na studiantenan di SGB.”

Elise ta aktivamente enbolbí ku dunamentu di forma na e proyekto di Kapital Kulinario na
Boneiru i e ta kontribuí ku puntonan di bista i ideanan balioso. Su dedikashon na
promoshon di enseñansa dentro di e sektor turístiko ta evidente. “Mi ta mira un futuro mi
dilanti kaminda enseñansa kulinario i kolaborashon internashonal ta fortifiká Boneiru su
sektor turístiko. Ku e inisiativa akí nos ke surpasá e abismo ku tin entre Boneiru i
institutonan di edukashon internashonal i stimulá inovashon. E skol na Bulgaria ta ofresé
vários programa na midí ku ta pagabel i sumamente profeshonal, diseñá spesialmente
pa studiantenan for di Boneiru,” segun Elise.

Ámbos studiante ta disidido pa krea kambio positivo i nan ta aspirá pa krea
oportunidatnan nobo pa nos komunidat lokal, mehorá e oferta kulinario di Boneiru i
kontribuí na desaroyo duradero di e sektor turístiko di nos isla. E eksperensia
transformador akí na Bulgaria lo amplia nan horizonte, i hasi posibel pa nan regresá
Boneiru ku konosementu i abilidatnan nobo.

Tokante e programa di beka

E Bonaire Tourism Scholarship Program ta yuda ku finansiamentu di kursonan di
desaroyo individual profeshonal i kursonan akadémiko fultaim riba tur tereno di
hospitalidat i maneho di turismo pa estudionan na nivel di Associate (MBO), Bachelor i
Master. E beka ta hasi posibel pa studiantenan i no-studiantenan meritorio logra nan
metanan edukativo i profeshonal i pa realisá nan soño. Banda di esaki e programa di beka
ta pèrmití e partisipantenan pa hasi uso di e oportunidatnan nesesario pa kontinuá ku
nan desaroyo profeshonal. E beka akí ta un instrumento efektivo tambe pa mehorá
selekshon di empleadonan lokal kualifiká i pa enkurashá mantenshon i kresementu
profeshonal den Boneiru su sektor turístiko.