KRALENDIJK – Tourism Corporation Bonaire (TCB) i Grand Windsock Bonaire pa di dos aña a representá Boneiru na e Vakantie Expo, un bolsa di vakansi, ku nan a tene for di 24 te ku 26 di yanüari 2025 na Antwerpen, Bélgika.  

Annette Emerenciana – Marketing PR & Project Coordinator na TCB, Jaedan Crestian – embahador boneriano i studiante, i Sander Winterberg – General Manager di Grand Windsock Bonaire, a partisipá na e bolsa. Mas ku 150 ekspositor di rònt mundu a eksponé na e Vakantie Expo di e aña akí, ku a atraé mas òf ménos 20.000 bishitante. Na e stènt di Boneiru e bishitantenan tabatin oportunidat pa sera konosí ku nos isla i su enkantonan típiko, su produkto turístiko i pa purba e karakter di nos isla den muestranan di Cadushy Liquor. Ademas, Grand Windsock Bonaire ku orguyo a presentá su ‘beach club’ nobo, huntu ku paketenan aktraktivo di fakansi.

Boneiru su partisipashon na e Vakantie Expo i otro eventonan komersial na Oropa, ta forma parti di un strategia mas amplio di merkadeo, ku enfoke riba oumento di su popularidat i riba su posishonamentu den e merkadonan, pa finalmente yama bon biní na mas bishitante for di merkadonan importante, entre otro Bélgika, na nos isla Boneiru. E representantenan di Boneiru a hiba vários kòmbersashon konstruktivo ku diferente operador di tour ku komo meta pa inkluí Boneiru den nan oferta di vakansi.

TCB ta yama danki na Grand Windsock Bonaire pa su partisipashon na e Vakantie Expo na Antwerpen i ta ansioso pa kontinuá ku su esfuersonan pa promové nos isla riba merkadonan importante na Oropa.