KRALENDIJK – Boneiru a dal un stap importante den e direkshon di inklusividat ku apertura di un rampa nobo pa personanan ku un desabilidat. E proyekto, ku a realisá bou di guia di Adely Jansen di Bonaire Overheidsgebouwen, ta un logro pa e isla i ta brinda fasilidatnan aksesibel pa personanan ku desabilidat.

Djarason 29 di yanüari a organisá un momentu festivo pa prensa. Ku un ròlstul spesial pa yuda personanan ku un limitashon pa drenta den laman via un rampa ku a konstruí spesialmente. Prensa, pero tambe hopi otro hende por a sigui e momentu impreshonante aki. Personanan ku un desabilidat di FKPD a bati man duru tambe ora a logra esaki. Adely Jansen, ku a dirigí e proyekto, ta deskribí e apertura komo un dia spesial. “Nos ta lucha pa inklusividat, di manera ku tur hende, no ta importá su mobilidat, tin akseso na nos bunita ambiente,” segun Jansen. “Tin poko sitio riba e isla ku ta dediká atenshon na personanan ku desabilidat i ta p’esei esaki ta un paso grandi pa dilanti. Nos a realisá fasilidatnan spesial manera un kabuya di zoya aksesibel pa ròlstul i un ròlstul adaptá  pa den awa. E bahada adaptá pa ròlstul no tabatin ainda na Boneiru.”.”

Rampa Edmundo (Eddy) Christiaan

No a mustra solamente e rampa kaminda personanan ku un desabilidat por drenta awa. Un di esnan den públiko riba e djarason mainta aki tabata Edmundo Christiaan. E humilde èks dosente di landamentu a haña un bòrchi spesial den e parke ku ta referí na e rampa, kaminda su nòmber ta aparesé.  Algu ku segun Christiaan no tabata nesesario: “Mi a duna hopi mucha na Boneiru aki lès. Mas mucha ku e poblashon di Boneiru na e momentu aki. Na tur mi ta kere ku mi a duna alrededor di 45.000 persona, hóben i adulto, lès. Sinembargo mi no a haña ku tabata nesesario ku mester kòrdami di e manera aki. Mi ta preferá ku hendenan ta kòrdami den nan kurason. Pero awor ku mi ta aki nan, mi por bisa si ku e dia aki ta èkstra spesial p’ami.”

Promé riba e isla

E rampa ta un primisia pa Boneiru. “Nos ta esnan promé riba e isla ku e fasilidatnan aki,” Jansen ta bisa ku orguyo. E proyekto ta forma parti di un inisiativa mas ámplio pa hasi e parke aksesibel pa tur hende, inkluso un lugá di stashoná outo pa personanan ku desabilidat i un aparato di gymnasia ku ta apropiá pa nan. 

Ounke e apertura di e rampa ta un éksito i hopi hende ta kontentu ku e inisiativa, Jansen ta ekspresá krítika tambe den direkshon di gobièrnu. E ta enfatisá ku mantenshon di e parke aktualmente pa gran parti ta dependé di finansiamentu privá. “Nos a aserká gobièrnu pa sosten, pero a haña komo kontesta ku no ta nan a pidi pa konstruí esaki. Mi ta haña esaki bergonsoso,” Jansen ta bisa. “Den dia tin empleadonan presente ku ta pèrkurá pa e parke keda nèchi. Anochi tambe tin vigilansia. Nos ta buskando diálogo ku gobièrnu i ta spera ku den futuro nos por traha huntu pa por mantené e parke nèchi.”

Rampa pa trailernan

Fuera di e fasilidatnan pa personanan ku desabilidat, e parke tin tambe un rampa nobo pa trailernan di boto. Ounke tabatin krítika riba e falta di un pir pa mara botonan, Jansen ta splika ku esaki tabata debí na atkisishon di pèrmit. “Nos tabatin mester di kasi 20 pèrmit pa por konstruí e parke aki. Tabata un reto, pero nos a logra,” segun Jansen. 

A pidi Diputado Clark Abraham pa un reakshon. Te ku awe e no a reakshoná riba e situashon.