KRALENDIJK- Djabièrnè Funsashon Mariadal a saka un komunikado ku e orario di e tres botikanan na Boneiru ku ta kai bou di e fundashon, ku tambe nan orario di atenshon na kliente.

E reapartura di Botika di Playa, den edifisio nobo di Fundashon Mariadal lo mester trese alivio den e situashon ku rèinan largu di pashènt pa tuma remedi. Por a nota sinembargo, ku e kehonan riba servisio, kantidat d hende ku ta wardando i tempu ku ta tuma pa wòrdu atendé ta sigui.

Hopi hende ta komentá ku pa un òf otro motibu e servisio i e prosesonan na e botikanan no ta kana di forma efisiente. Prinsipalmente no ta komprondé ku si ofisinanan di dòkter ta manda e reseta di antenamo, pakiko e remedinan no por ta kla poní pa ora kliente yega tuma su remedi, pero tin ku sinta warda turno, igual na kalke hende ku ta kana yega na botika ku reseta den nan man.

Inovashon

Ta parse ku inovashon teknológiko ta pasando Boneiru forbei, ora ta trata di téknikanan nobo òf nivel di servisio pa loke ta trata distribushon di remedi. Esaki a pesar di e echo ku poblashon di Boneiru a krese drástikamente den último añan aki, pero no a bin un kresementu den kantidat di botika.

Pregunta ta kuantu botika lo ta ‘normal’ pa tin pa e kantidat di hende na Boneiru. Un komparashon ku Hulanda ta mustra ku na Hulanda tin 1 botika pa kada 8.479 habitante, pero na Belgika tin un botika pa kada 2.400 habitante. Na Boneiru tin 1 botika pa kada 7.333 habitante si konta esnan di Fundashon Mariadal so i 1 botika pa kada 5.500 habitante si konta Botika Sabana aden.

Turista

Esaki, sin embargo, ta sin konta e kantidat di turista ku ta bishitá Boneiru pa aña (191.000) por bisa ku pa luna tin masomenos 15.000 hende adishonal riba nos isla, o sea 37 mil persona. Si dividí e kantidat aki pa a kantidat di botika na nos isla (inkluyendo Botika Sabana) tin un botika pa kada 9.250 persona presente riba e isla. Esaki klaramente ta ménos ku ta e kaso na Hulana. Por bisa ku e preshon riba e botikanan ta mas haltu ku ta e kaso na Hulanda.