KRALENDIJK – Gaby Ana Gabriela, mihó konosí komo Gaby Strong, ta un presensia konosí den skolnan di deporte na Boneiru. For di su yegada riba e isla e no a desaroyá solamente su propio pashon pa deporte, pero a krea tambe un moveshon ku ta inspirá hopi hende muhé: ChicaStrong. E motivashon di Gabriela: “Mi ke yuda hendenan muhé pa kere den nan mes i mustra ku nan por hopi mas ku nan ta pensa.”

“Mi ta fundadó di ChicaStrong,” Gabriela ta konta. “Ora mi a yega Boneiru na aña 2017, mi a kuminsá trein mesora den gym. Riba un dia un grupo di mucha muhé a aserká mi. Nan a kontami ku nan ta atmirá mi manera di trein i a puntra ku nan tin mag di partisipá huntu kumi. Esei tabata e komienso di mi seshonnan gratis di trein pa hende muhé.” Na luna di sèptèmber 2018 Gabriela a disidí di hasi su pashon su trabou i a lanta ChicaStrong. 

Un komunidat kresiente di hende muhé fuerte

ChicaStrong a krese mientrastantu bira un komunidat uní ku ta traha huntu na nan salú físiko i mental. “E aña aki mi ta trahando ya pa shete aña komo entrenadó di ChicaStrong,” Gabriela ta bisa ku orguyo. “Durante añanan asina hopi hende muhé a trein kumi, i hende hòmber tambe ta afiliá mas i mas. Tambe mi ta duna entrenamentu na mucha for di 2024. E grupo aki mi ta yama ChikiStrong. Mi ta gusta pa hasi muchanan konsiente na edat hóben kaba pa kome salú. Na mi opinion ta importante pa hasi deporte. Kon grandi ku bo ta. Yuda muchanan hóben mi ta haña importante pa desaroyo di nan futuro.”

Banda di entrenamentu ChicaStrong ta muchu mas ku deporte so. “Nos ta forma un famia,” Gabriela ta splika. “Nos tin un grupo kaminda nos ta kompartí i plania idea. Tur luna nos ta organisá algu plasentero, manera un máratòn, un paseo den boto òf simplemente sali un anochi bai balia. Ku Pasku por ehèmpel nos tur ta bini huntu.”

Mas ku forsa físiko so

Na ChicaStrong e enfoke no ta solamente riba forsa físiko, pero tambe riba fomentá konfiansa propio i un estilo di bida salú. “Nos ta siña e hendenan muhé kon nan por keda salú, tantu físikamente komo mental, mediante bon nutrishon i moveshon,” Gabriela ta konta. “Hopi di nan a siña di hasi mihó eskoho den nan patronchi di kuminda i ta hiba un bida mas salú. Ta mi soño ku e hendenan ku mi ta trein bira mas motivá pa loke ta trata nan salú i nan kondishon físiko.”

Un aspekto importante di Gabriela su aserkamentu ta e aspekto sikológiko. “Mi ke pa e hendenan muhé ku ta trein serka mi wak den spil i ta orguyoso di ken nan ta,” e ta bisa. “Ku nan ta sinti amor propio i kere ku nan por alkansá tur loke nan ke. Tin hende muhé ku ta pensa ku nan no por realisá kambio, pasobra nan a faya den pasado. Mi ta yuda nan pa kere den nan mes i alkansá nan metanan.”

Un movementu diversifiká i inklusivo 

ChicaStrong ta yama bonbiní na hendenan muhé di tur nashonalidat. “Nos ta akseptá tur hende,” Gabriela ta enfatisá. “Mi a haña oportunidat pa traha ku hendenan muhé di diferente nashonalidat: Hulandes, Antiano, Peruano, Chines, Dominikano, Colombiano i hopi mas. ChicaStrong ta un movementu pa tur hende muhé ku ke bira mas fuerte, tantu físikamente komo mentalmente.”

Plannan pa futuro

Pa e aña nobo Gabriela tin plannan grandi. “Nos ta kuminsá ku 40 hende muhé ku ta partisipá di nobo, i lo bini miembronan nobo tambe aserka den e famia tremendo aki,” e ta bisa entusiasmá. “ChicaStrong ta para pa forsa, kurashi i konfiansa propio. Mi ke yuda hendenan muhé pa kere den nan mes i mustra ku nan por hopi mas ku nan ta pensa.”

Ku su aserkamentu inspirativo Gaby Ana Gabriela ta keda un ehèmpel pa hopi hende muhé na Boneiru i eifó. “Un hende muhé ku ta apresiá i stima su mes, ta kuida su salú i su kurpa,” e ta konkluí. “Konfiansa propio ta nifiká ku bo ta kere den loke bo mes ta hasi i no ta entreg’a nunka. Esei ta loke ChicaStrong ta para p’e.”