DEN HAAG – E defensor di pueblo Hulandes ta mira mehorashon den e situashon di studiantenan Karibense ku ta bini Hulanda pa studia. A mehorá e preparashon i guia di e studiantenan. Mientrastantu mayoria di e studiantenan Karibense ta bini tambe na remarke pa un seguro médiko básiko i supsidio di asistensia.

E defensor di pueblo ta mira ku sigur tin espasio pa sigui mehorá. Awe el a publiká su último resultadonan den un rapòrt final. E ta pasa e batuta awor i ta pidi e Grupo di Kordinashon éksito di estudio di studiantenan Karibense pa traha huntu i sigui drecha e situashon pa e studiantenan.

Na 2020 Defensor di pueblo Nashonal a hasi investigashon di e problemanan ku studiantenan di e parti Karibense di Reino ta topa ora nan bini Hulanda pa studia.

El a konstatá ku e informashon  i guia na studiantenan tabata malu. Nan no tabata haña tampoko un Number úniko di Seguridat Sosial, BSN. Sin BSN por ehèmpel studiantenan no por habri un kuenta di banko.

Nan no por a hasi uzo tampoko di un seguro médiko básiko, apesar ku nan tin un pasaporte Hulandes. I konsekuentemente nan no tabata bini na remarke pa supsidio di asistensia.

Enkambio studiantenan si tabata pensa ku nan ta bini na remarke i tabata apliká pa e supsidio. Esaki a hinka nan despues den problemanan finansiero pasobra nan mester a paga e supsidio aki bèk.

Finalmente e defensor di pueblo a mira ku tabatin problema na momento di paga e debe di estudio bèk ora ku nan regresá e islanan. Esaki a resultá den reto- i problemanan finansiero grandi pa e studiantenan Karibense.

Mehorashon

Den e rapòrt Kopzorgen van Caribische studenten e defensor di pueblo a hasi algun rekomendashon. Pa evitá ku su rapòrt ta bai den un lachi el a pone man na obra i kontrolá i traha riba e mehoramentu nesesario.

Defensor di pueblo Nashonal Reinier Van Zutphen: “Studiantenan di e parti Karibense di Reino ta topa tur sorto di problema ku studiantenan ku a nase na Hulanda no tin. Esei no ta hustu i ta malu.”

“P’esei e último añanan mi a komprometé mi mes fuertemente huntu ku mi koleganan pa pèrkurá ku ta solushoná e problemanan di e studiantenan Karibense mas lihé ku ta posibel.”

Akshon 

Afortunadamente kambionan a bini, ounke tin puntonan di atenshon tambe. Van Zutphen: “Tin mihó informashon i guia pa studiantenan Karibense. Aparte di esei ta bai wak kon studiantenan Karibense ta haña mésora un BSN na momento di apliká pa finansiamentu di estudio via DUO. Mi ta haña esei stapnan bon i bunita di bèrdat.”

Di otro banda no por regla esaki pa studiantenan di e aña di estudio benidero 2023-2024. “Mi ta haña esei lástima i desepshonante. Tambe mi ta mira ku studiantenan mester di ayudo na momento di buska kas i inskripshon na tempu den Registrashon Básiko di munisipionan.”

Tambe nan mester di mas ayudo segun defensor di pueblo ku lei- i normanan kompliká na Hulanda. “I mi ta mirando ketu bai problema ku pago bèk di debenan di estudio na momento di regresá e islanan. Pues nos tur no por flakiá i mester sigui traha fuertemente.”

Batuta

E defensor di pueblo ta pasa e batuta awor. A pone un base fuerte e añanan ku a transkurí. E partidonan sa di haña otro i e tarea ta evidente. Pa e motibu ei e defensor di pueblo ta pidi e Grupo di Kordinashon éksito di estudio di studiantenan Karibense i kaminda ta posibel Kas di Aruba, Kas di Kòrsou i Kas di Sint Maarten, pa mira kiko ta nesesario pa solushoná mas lihé ku ta posibel e problemanan ku a sobra pa studiantenan Karibense. I keda yama atenshon di instanshanan di gobiernu. 

Naturalmente e defensor di pueblo ta keda sigui e desaroyonan i ta yuda e studiantenan Karibense na momento ku nan tin un keho.