KRALENDIJK- Un delegashon di Konseho Insular di Boneiru a biaha pa Hulanda pa tuma parti den un seri di reunionnan importante i diálogonan ku stipuladónan di maneho. 

E diskushonnan ta enfoká riba fortales’é e kooperashon entre Boneiru i Hulanda.

Ademas di e reunionnan stratégiko, e miembronan di Konseho Insular lo asistí tambe na un evento spesial di hóbennan di Boneiru. E evento aki ta marka e lansamentu ofisial i eksposishon di un buki di portrèt, komponé pa un asina yama “denk-tank”. E buki tin historia di 33 hóben; tantu di Boneiru komo di Hulanda ku ta kompartí nan bista personal riba futuro di Boneiru i nan retonan ku nan a superá. E proyekto ta ofresé un bista balioso pa stipuladó nan di maneho, polítikonan i profeshonalnan, i ta sirbi komo inspirashon pa tantu e generashon aktual komo e generashon nobo.

Ku nan bishita i partisipashon aktivo, e miembronan di Konseho Insular ta suprayá nan kompromiso na fortales’é e relashonnan entre Boneiru i Hulanda, tambe pa stimulá partisipashon di hóbennan i inovashon nan den desaroyo di Boneiru.

Tur miembro di Konseho Insular lo ta bek na Boneiru pa dia 29 di yanüari pa asistí na e siguiente reunion di Konseho Insular.