ORANJESTAD- Diálogo Sentral St. Eustatius (CDS) ta hopi krítiko riba medida tumá dor di kabinet hulandes, ku na nan aparecer ta kontraproduktivo pa loke e mesun kabinete ta bisa ku nan ke logra, esta ménos pobresa riba e islanan Boneiru, St. Eustatius i Saba. 

Den un deklarashon ku CDS a saka djabièrne nan ta mustra riba diferente medida ku a tuma últimamente, ku lo por impaktá ekonomia di e islanan den forma negativo. 

Entre otro ta mustra riba e bahada di e suma ku ta liber di impuesto (belastingvrije som), pero tambe e triplifikashon di gastunan pa Kámara di komèrsio i tambe e fin na subsidio riba prèis di awa, koriente i internet. 

CDS ta mustra tambe ku e ekonomia di e islanan a keda basta débil despues di e daño kousá pa e pandemia di Corona i ku e medidanan kontraproduktivo, manera ta yama nan, lo empeorá e situashon na lugá di mehorá.

Diálogo

CDS ta mustra tambe riba e importahsna di komunikashon i diálogo entre e islanan i kabinete na Hulanda. “Nos ta realisá ku e responsabilidat pa dialogá ta eksistí na ambos banda, pero ta importante pa esaki tuma lugá”, asina e órgano a trese dilanti. 

CDS ta mira un falta, no solamente di diálogo, pero tambe di koordinashon entre e diferente ministerionan ku tin di haber ku Karibe Hulandes.