PHILIPSBURG- E siman aki a kuminsá na St. Maarten e programa di dos aña pa formashon di polis pa un total di 11 aspirante nobo di Kòrps Polis Hulanda Karibense (KPCN).

E aspirantenan di KPCN ta sigui nan formashon huntu ku siete aspirante di e kuerpo polisial di St. Maarten (KPSM). E lansamentu di e programa a tuma lugá na e stashòn di polis na Philipsburg, kaminda tabata tin diskurso di entre otro, e Minister di Hustisia di St. Maarten, Nathalie Tackling, e hefenan di kuerpo polisial di tantu KPCN, Alwyn Braaf, komo KPSM, Carl John.

E 11 aspirante di KPCN lo sigui e parti teorétiko di nan formashon na St. Maarten pa despues pasa den un periodo di práktika na Boneiru. Ora nan a terminá e programa, nan lo risibí un diploma di polis na nivel MBO-4 i lo ta disponibel pa traha na Boneiru, St. Eustatius i Saba.