KRALENDIJK – Na aprel Dienst Uitvoering Onderwijs (DUO) ta bishitá Boneiru, Sint Maarten, Sint Eustatius i Saba. DUO ta habri un ofisina di servisio temporal riba e islanan aki pa papia ku futuro i eks studiante.

Ademas DUO ta organisá enkuentronan di informashon tambe i ta ofresé asistensia personalisá pa problema di pago na e sitionan. E bishita ta un kontinuashon di e bishita na Aruba i Kòrsou aña pasá. Pa futuro studiante riba e islanan DUO ta organisá un webinar. 

Enkuentronan di informashon 

E enkuentronan di informashon ta enfoká riba studiante ku ta bai studia na Hulanda i nan mayornan. Durante e enkuentronan nan ta tende tur kos tokante finansiamentu di estudio i otro asuntunan ku nan mester regla na Hulanda. Na Sint Maarten ta tuma lugá tambe un enkuentro di informashon pa eks studiante. Durante di esaki ta duna entre otro informashon tokante e posibilidatnan pa pidi un midimentu di kapasidat finansiero, pago bèk lokalmente i kiko mester hasi ora tin problema ku pago. 

Ofisina di servisio temporal 

Personanan por pasa na e ofisinanan di servisio temporal ku tur pregunta tokante finansiamentu di estudio hulandes i pago bèk di nan debe di estudio. Pa bishitá un ofisina di servisio no tin mester di traha sita. Eks studiante mester bin ku un prueba di identidat si. I si kier pidi redukshon di e montante mensual, mester trese tambe un resúmen di entrada. Di e manera ei DUO por yuda e grupo di enfoke mesora si esei ta posibel.

Ayudo personalisá

DUO gustosamente kier yuda evitá ku eks studiante ta hañ’é den problema finansiero. P’esei eks studiante ku un retraso den pago serka DUO ta haña un último oportunidat pa evitá ku ta pone esaki den man di un ofisina di incasso. Un parti di nan ta haña un invitashon di DUO pa bin papia ku un kolaboradó pa yega na un solushon na midí.

Informashon online na Aruba i Kòrsou 

Pa futuro studiante na Aruba i Kòrsou DUO ta organisá un webinar. Esaki ta un kontinuashon di e enkuentronan di informashon ku a tene na novèmber. Si tin pregunta (eks) studiante di Aruba i Kòrsou por tuma kontakto via chat i videocall ku DUO.

Mas informashon 

DUO ta di 11-21 di aprel na Boneiru, di 11-21 di aprel na Sint Maarten, 25 i 26 di aprel na Sint Eustatius i riba 28 i 29 di aprel na Saba. Mas informashon tokante e sitio i orario di apertura di e ofisinanan di servisio i orario di e enkuentronan di informashon por haña riba duo.nl/bezoekantillen.