RINCON – Riba e tribunanan  di e stadionnan di futbòl Boneriano bo ta haña ku regularidat un grupo fiel di simpatisante: Derrolt Janga, su kasá Judith Janga-Frans, nan primu Rafelito Janga i Silveio Mercera. Kada fin di siman di nobo bo ta haña nan einan, nan wowonan fihá riba e fèlt, gosando di e kompetensia di futbòl lokal. “Nos no ta pèrdè niun wega,” Derrolt Janga ta konta. “E ta un tradishon ku nos ta mantené bibu ku hopi plaser.”

Ounke Derrolt Janga mes no a praktiká futbòl aktivamente, su amor pa e deporte ta profundo. “Mi gusta sinta wak,” e ta bisa. Su kasá Judith ta agregá: “No ta e wega so riba su mes, pero tambe e ambiente i ta huntu ku amigu- i famianan ku ta hasi esaki asina spesial.” Pa Rafelito i Silveio e ta un manera pa selebrá nan vínkulo ku Boneiru, asta ora ku Silveio ta biba mitar aña na Hulanda. “Mi ta bini seis luna pa aña bèk Boneiru,” Silveio ta splika. “Ta mi manera pa keda den kontakto ku mi raisnan.”

E loke ta úniko di e kompetensia Boneriano

E kompetensia di futbòl Boneriano tin su propio karisma. Derrolt ta splika: “E ta diferente di sinta wak futbòl Hulandes òf Champions League na televishon. Aki bo ta sinta den stadion, bo ta eksperensiá e wega i bo ta sinti e energia di e hungadónan. E ta kurú i real.” Ounke e asistensia sa vária, dependiendo di e timnan ku ta hungando, bo ta sinti semper e pashon serka e públiko. “Na weganan manera Real Rincon kontra Uruguay e stadion ta yen yen,” Derrolt ta bisa. “E kompetensia podisé no ta asina grandi, pero e tin su propio magia si.”

Un laso familiar

Pa e Janganan i Silveio e asistensia na e weganan ta mas ku solamente un hòbi; e ta un aktividat familiar. “Nos konosé e hungadónan, e timnan, i despues di tempu bo ta krea un laso ku nan,” Judith ta konta. Bo ta rekonosé e karanan, bo sa ken e hungadónan estelar ta.” Ounke e temporada a kaba di kuminsá, nan espektativanan ta haltu. “E timnan manera Real Rincon i Atletico Flamingo semper ta fuerte,” Derrolt ta pronostiká. “Nan lo kompartí e preisnan atrobe.”

Silveio su regreso pa Boneiru

Ounke Silveio Mercera ofisialmente ta biba na Hulanda, e ta sinti su mes konektá ku Boneiru. “E ta un sentimentu di yega kas,” e ta bisa. Akinan mi no mester preukupá ku e korekore di Hulanda. Mi por gosa gewon di e wega i e hendenan rondó dimi.” Su estadia anual ta un chèns pa deskubrí di nobo e kultura i deporte di su isla natal.

E futuro di futbòl na Boneiru

Ku e desaroyonan resien i invershonnan den fasilidatnan di deporte riba e isla, e futuro di futbòl na Boneiru ta prometedor. “E tim nashonal ta profilando bon den Liga di Nashonnan,” Derrolt ta bisa entusiasmá. “Ta tremendo pa mira kon e deporte ta krese akinan i haña mas rekonosementu.” E speransa ta ku Boneiru lo pone su mes mas i mas riba mapa den e mundu internashonal di futbòl.

Pa  Derrolt Janga, Judith Janga-Frans, Rafelito Janga i Silveio Mercera futbòl na Boneiru ta mas ku un deporte; e ta un moda di biba. Nan dedikashon i pashon pa e wega no ta hasi nan solamente simpatisantenan fiel, pero tambe embahadornan di e kultura di deporte Boneriano. “Nos ta orguyoso di nos isla i nos timnan,” Derrolt ta finalisá. “I tanten ku tin wega, lo bo sigui mira nos riba tribunanan.”