KRALENDIJK- E promé kompetensia di piskamentu pa promé biaha, ku a karga e nòmber ‘Torneo di Piska Playa Frans’ a resultá un eksito. 

Lee Anthony i Hubert Figaroa, a organisá e evento i sigur nan por mira bek riba un aktividat eksitoso. Kantidat di piskadó a partisipá i a saka 4 ganadó. 

Durante mainta e piskadónan a bai ku nan boto i a piska mas tantu piska posibel i algu despues di 12or a trese tur piska dilanti di Verona’s Bar & Restaurant. A pisa tur piska pa asina wak ken ta e persona òf su tim, ku a piska mas piska riba e mainta. E torneo di piskamentu a pèrkurá pa un tremendo ambiente na e sitio den Rincon. Ta trata di kompetensia di piskadónan boneriano. Diferente empleado di STINAPA tabata presente i den bon union, e aktividat a kana bon. Piskadónan tabata tira palabra na otro, un harimentu formal.  

Lee i Hubert, a risibí bon komentario di partisipantenan, ku nan tabata kontentu ku e aktividat organisá. Lee a bisa e deseo ta pa denter di algun aña, regalá esun ku gana e kompetensia di piskamentu, gana un boto.    

Ganadó

Ganadó ku mas kilo di piska pisa, a resultá na promé lugá: Patrick Mercera, 32,9 kilo. Na di 2 lugá Rogelio Dortalina 16.7 kilo di piska i na di 3 lugá Ricky Jonsen, ku 15 kilo di piska. Ali tabatin e piska ku a pisa mas.  STINAPA a regalá tur doño di boto piskadó partisipante, un bunita regalo.  

Anthony  ku Figaroa a gradisí tur spònser ku a kere den nan i a hasi e aktividat unu eksitoso.