Kralendijk – Awe sinku di nos enfermera- i enfermeronan a risibí e sertifikado di Kuido Agudo Básiko. Sekretario di Salubridat Públiko, Bienestar i Deporte, Maarten van Ooijen, tabata presente na esaki via un konekshon di video. A krea e formashon Kuido Agudo Básiko pa motibu ku durante e pandemia di Covid a resultá ku a surgi un eskases grandi di enfermera i enfermero pa e departamentonan di kuido agudo.

E enfermero i enfermeranan boneriano ku a finalisá e formashon akí ku éksito ta: Maureen Leocadia, Jurdenne Trenidad, Emely Janga, George Michel i Rebecca Menzies. E sinku profeshonalnan akí a disidí ku despues ku nan kaba ku nan formashon pa Kuido Agudo Básiko nan ta bai spesialisá nan mes pa Ayudo di Emergensia, Rekuperashon i Kuido Intensivo. Na luna di yüni 2022 seis otro enfermera i enfermero di Boneiru lo bai sigui e formashon pa Kuido Agudo Básiko.

E formashon pa Kuido Agudo Básiko ta forma parti di e programa di kapasitashon Caribbean Health Academy. Fundashon Mariadal i Fundashon Mariadal Academy ta forma parti di e kolaborashon akí pa Boneiru. Duna formashon na profeshonalnan den kuido ta un di e metanan di e hòspitalnan ku ta kolaborá ku otro den Dutch Caribbean Hospital Alliance (DCHA i.o.).