KRALENDIJK – ABC Online Media a entregá un petishon WOB na organisashon di naturalesa Stinapa i Entidat Públiko Boneiru (OLB) relashoná ku morto di un krokodel. Intenshon di e petishon ta pa haña klaridat riba e sirkumstansianan rondó di morto di e bestia i pa investigá si e instanshanan konserní a tene nan mes na e protokòlnan redaktá pa esei. Te ku awe no a duna klaridat riba e petishon.

Stinapa a reakshoná mientrastantu riba e petishon i ta deklará ku e organisashon no ta kai bou di e Lei di Atministrashon Públiko BES (WOB BES). Segun Stinapa e no ta un órgano gubernamental i p’esei e ta kai pafó di e embergadura di artíkulo 3 di e lei aki. Esaki ta nifiká ku nan no ta haña nan mes obligá pa públiká e informashon pidí.

OLB no a kumpli ku e fecha límite i ta pidi posponementu 

Entidat Públiko Boneiru na su turno a pidi pa aplasá e petishon WOB pa 23 di yanüari 2025. Sinembargo, nèt promé ku e fecha límite aki, a bira konosí ku e instansha lo no a alkansá esaki. Segun un konsehero hurídiko esaki ta debí na e echo ku sierto empleado ku tabata enbolbí den e fail, no ta traha mas na OLB. Banda di esei e instansha ta trahando ainda ku buska e-mail i mensahenan di Whatsapp ku ta relevante pa e petishon.

OLB a pidi pa laga e prosesamentu di e petishon di WOB tuma lugá dentro di un término rasonabel. E redakshon di bonaire.nua duna di konosé di ta dispuesto pa konsedé maksimal djes dia di trabou pa realisá e término aki. E término a kaduká djaweps 6 di febrüari. Te ku awe no a bini reakshon ainda riba e proposishon aki. E petishon tambe pa kuminsá ku kompartí dokumentunan disponibel, a keda sin kontesta.

Klaridat riba kousa di morto di krokodel

E kousa di morto di e krokodel ta keda un punto di diskushon. Spesialmente pasobra a tene media riba distansia na momentu di e kaptura. OLB a deklará ku e bestia a muri a konsekuensia di ‘strès di kaptura’. Pa verifiká esaki i pa sak’afó si Stinapa i OLB a sigui e proseduranan korekto, ABC Online Media ta keda insistí riba publisidat di e dokumentunan.  

Por lo pronto e kaso no ta será. Si no bini mas koperashon, un siguiente stap ku ta posibel ta pa pidi wes pa atendé e kestion.