WILLEMSTAD – Fundashon Beeldentuin Blue Bay a añadí un skultura nobo i impresionante na su kolekshon. Djaluna 27 di yanüari, ‘Palu di Spiritu II’, un obra maestral di artista renombrá di Kòrsou Giovanni Abath, a ser revelá ofisialmente den presencia di e artista mes.

Giovanni Abath, nasé i kresé na Kòrsou, ta un artista konosí pa su skultura inovativo i instalashonnan ku ta hasi un konekshon entre herensia lokal i arte moderno. Su obra, ku ta kombiná materialnan manera steinles stil, palu i heru, por ser admirá na luganan públiko manera Brionplein i na Beeldentuin di Blue Bay.

‘Palu di Spiritu II’ ta e susesor di e obra anteriormente  konosí di Abath i ta reflehá e  konekshon fuerte entre naturalesa, kultura i forsa espiritual di Kòrsou. E skultura ta referí na e palu indígena Casearia tremula òf Geelhout, konosí lokalmente komo ‘kenepa spirito’, un palu ku tin un balor simbóliko hopi haltu riba e isla. E obra di Abath ta emaná grandesa i forsa. Palu di Spiritu II’ ta para komo un warda i ta rekordá nos ku bo por haña rais, asta den e bientunan mas furiá.

‘Palu di Spiritu’ tambe tin un ròl sentral den e pelíkula premiá Buladó di aña 2020, ku a haña hopi elogio na e Festival di Pelíkula Hulandes i a gana e premio di  Gouden Kalf pa e mihó pelíkula. Den e pelíkula, e skultura ta simbolisá konekshon, forsa i transformashon. Giovanni Abath no ta solamente un artista, pero tambe un embahadó kultural di Kòrsou. Su obra, aparte di ‘Palu di Spiritu’ ta inkluí instalashon manera Man of Steel ku por wak den Beeldentuin Blue Bay, i History in Motion na Brionplein, ta demostrá su versatilidat i profundidat. Den su tayer i galería, e 7.1 Experience na Landhuis Morgenster, bishitante por deskubrí mas di su obra úniko.

Entrada gratis

Beeldentuin Blue Bay ta habrí tur dia i por bishitá gratis, ofresiendo un eksperensia úniko di arte i naturalesa. Pa esnan ku ke sa mas di e skulturanan, tin tur di guia ku un karèt di gòlf pa un kontribushon chikí. Pa skolnan spesífikamente, tin un proyekto edukativo ‘Schoolvoorbeeld’, ku ta introdusí skolnan na un manera inspirativo na e skulturanan kreá pa artistanan di Kòrsou.