KRALENDIJK – Djaluna atardi, Fundashon Mariadal a presentá e proyekto pa konstruí e botika nobo, Botika Antriol. Na e okashon di desvelo di e bòrchinan, dòkter Giovanni Frans, direktor di Fundashon Mariadal a dirigí palabra.  

“Awe nos ta mustra e sitio kaminda e Botika Antriol ta bini pronto. E botika na Playa ta funshoná bon ku e struktura ku e tin. Plan ta pa den futuro, e pashènt por pasa kualke momentu i tuma su remedi, apesar ku e botika ta será. Tambe a kuminsá pensa pa den futuro, pa hospital tambe sali for di Sentro di Suidat”, asina dòkter Frans a splika. 

“Ta un proyekto ku ta importante pa hendenan di Nort di Saliña i Antriol. Komunidat a krese. Na e botika den Bario Antriol, e stashonamentu i sirkulashon di hende i outo tabata fastioso. Awor un botika nobo ta bini i a haña un bon lugá pa stashoná. Ta un hoya di proyekto ta bai konstruí aki. Nos metanan ta pa traha dirigí pa e hende den barionan”, asina diputado Hennyson Thielman a bisa. 

Segun kolega diputado James Kroon a bisa, ku ora a tende ku lo bai traha e botika nobo na Kaya Korona, esaki tabata parse un bon pensamentu. “Na momentu e pensamentu a bini pa traha un botika na Kaya Korona i a yega na e sitio aki, e ta un bon desishon, bon pa duna e servisio ku un botika mester duna. Ta drechando kaya Korona, pues henter e área ta bai keda bunita. Huntu nos ta forma un bon komunidat i nos salú ta na promé lugá.” 

Mehorashon

Botikario Neil Nicolaas tambe a duna su pensamentu. “Na nòmber di botika mi ke pa tur hende mira kiko nos ta bai logra. E sistema di pidi resèpt i hende por bai dirèkt botika, ta funshoná bon awor. A mehorá tambe e kuido di pashènt na kas. Fundashon Mariadal ta para pa kuido sigur. Nan tei pa duna un kuido profeshonal.”

Despues a sigui ku desvelo di 2 bòrchi, ku informashon di e botika nobo.