KRALENDIJK – Fundashon Mariadal ta dispuesto pa duna su koperashon na un investigashon pa determiná kiko ta e mihó manera pa organisá e servisio di Air Ambulance na Boneiru. Esaki al ménos  ta loke e Fundashon ta bisa den un komuníkado di prensa djabièrnè.

Aktualmente Erwin Arkenbout komo konsehero independiente ta hasiendo investigashon kon buelonan di ambulansia aéreo pa siguradonan di ZJCN por wòrdu ehekutá, ámbos riba termino kòrto i termino mas largu. E investigashon di Arkenbout ta tuma lugá riba petishon di Ministerio di Salú, Bienestar i Deporte.

Otro tono

Den su komuníkadó di prensa di djabièrnè, Mariadal ta usa un tono kompletamente diferente for di esun ku por a skucha den lunanan tras di lomba, kaminda e hospital no a mustra niun klase di disposishon pa kompartí su pensamentunan òf motivá desishonnan tumá pa loke ta trata e situashon di Air Ambulance. 

Te ku resientemente realmente e úniko meta di Mariadal tabata parse di dirigí riba eliminashon di e kompania lokal Medicair, na fabor di un operador nobo for di eksterior.