KRALENDIJK—Ayera anochi Fundashon UNTAHF a reuní ku kabesantenan di grupo di karnaval, kaminda a papia riba diferente punto importante. E ruta di karnaval grandi ta bira mas largu. Awor e ta sali bèk manera ántes for di stadion di Playa subi Kaya Internashonal kaba bai den Kaya Industria i sigui e ruta kustumbrá. 

E siman ku ta bini UNTAHF ta bai informa mas eksakto e ruta i e ora ku karnaval ta bai kuminsá. Tin tur indikashon ku e ta Sali 1or di mèrdia i e último grupo mester ta na final pa 6or di atardi.  

Jorge Wanga Korps Politie Caribisch Nederland a papia tokante velosidat ku e marcha tin ku bai kuné i otro rekisitonan ku mester tene kuenta kuné.  Albert Crestian di Toezicht & Handhaving a splika kon ta e mihó manera pa atendé ku e parti di kuminda i kos friu, pa evitá ku nan ta daña.

16 grupo

UNTAHF a bisa esnan presente ku nan ta informá pa un otro enkuentro pa papia riba e detayenan final. E aña aki a inskribí 16 grupo pa marcha grandi i 4 grupo pa karnaval hubenil.