KRALENDIJK – Fundashon Wega di Number Bonaire (FWNB) a hasi un donashon di 5,000 dòler na S.V. Athene komo parti di selebrashon di 30 aniversario di e Fundashon. FWNB den kuadro di selebrashon di su 30 aniversario durante di e próksimo lunanan a skohe pa duna diferente organisashon di deporte, organisashon ku ta hasi trabou karitativo, organisashon kultural I enseñansa  ku ta traha riba kuido I òf edukashon di mucha I hoben riba nos isla.

E kolaboradó di FWNB ku mas aña den servisio ku ta Carine Thielman tabatin e privilegio pa a skohe e promé organisashon pa otorgá un donashon. 

Thielman a skohe S.V. Athene ku ta un organisashon di e deporte atletísmo. Motibu ku Thielman a skohe S.V. Athene ta ku e deporte aki ta desaroyá e hoben mental I físikamente, ku e hoben por siña tur sorto di karakter ku den futuro e por tin mester di nan den su bida diario. Faktornan manera disiplina, rèspèt I perseveransia ta hunga un ròl hopi grandi den e deporte aki. 

Tabata durante di training na stadion di playa FWNB a sorpresa bestür,coach i atletanan di S.V. Athene ku e bunita gesto aki. Bestür, coach i atletanan tabata super kontentu ku e donashon inesperá aki.

Despues di a otorgá e chèk simbóliko di 5,000 dòler na S.V. Athene FWNB a trit e muchanan, ku algu di kome I bebe serka Tio Pepe.

Fundashon Wega di Number Bonaire ta gradisí tur kliente ku a depositá nan konfiansa den e Fundashon I ta sigui konta ku boso apoyo pa asina FWNB tambe por sigui  kontribuí ku komunidat di Bonaire.