KRALENDIJK—Djasabra mainta, Sorteo Wega di Number Bonaire, a selebrá 10 aniversario. E selebrashon tabata na Parke Isidel huntu ku invitadonan. Na e okashon nan a entrega 8 ekipo di futbòl un montante di 2500 dòler pa kada ekipo. 

Anne Marie Mercera, direktora di FWNB, a dirigí palabra bisando: “ Wega di number for di promé aña na Boneiru a mira ku e tin un  desaroyo ta positivo. Ta trahando riba diferente wega nobo, pa hasi mas grupo di hende interesá den e weganan”. 

Mercera a splika tambe ku ta ku e plaka ku FWNB ta generá,  ta hasi donashonnan na organisashon i instansianan ku ta hasi trabou na bienestar di komunidat, spesialmente den e parti di deporte, kultura, trabounan karitativo i enseñansa. E prioridat ta organisashon ku ta traha pa mucha i hóben.

INDEBON huntu ku Gobièrnu di Boneiru a bini ku un proyekto pa sostené organisashon-

instansianan di deporte ku tin mucha i hóben ku un suma di sèn pa nan por start 2025

kuné, pa kubri gastunan manera unifòrm, material entre otro. Den kuadro di hubileo di Sorteo Wega di Number Bonaire FWNB, ta sostené 8 ekipo di futbòl, ku tin hóbennan ta pertenesé na dje, ku un donashon di 2.500 dòler. 

Donashon

Ku e gesto, FWNB ke enkurashá pa sigui traha i eduká nos hóbennan, pa asina krea un

bon base pa futuro.  SV Juventus, Real Rincon, Atlétiko Flamingo, SV Vespo, SV Uruguay, Titans Atlétiko Tera Kòrá ATC, Young Boys i Vitessse ta e timnan ku a risibí e donashon.