KRALENDIJK—Hóbennan di Boneiru ku ta bai studia na Hulanda, djaluna atardi lat nan a  sali pa Hulanda ku KLM. 

Freddy van den Heuvel, begeleider di Tim TuranGoeloe, a bisa e atardi promé ku e hóbennan a biaha pa Hulanda, ku ta trata di 38 studiante. “Awe 20 studiante ta biaha pa Hulanda ta biba i studia. Ya tin 18 ku a bai riba nan mes i ta sperando nos yega pa djòin. Nos ta atendé tambe studiantenan di Saba i Sint Eustatius. 

Tur studiante ta bai Den Haag i einan ta atendé ku nan. Despues di 1 dia ku nan yega, ta reuní ku tur, bou di guia di TuranGoeloe. Ya tin tres aña tin ku TuranGoeloe ta guia e hóbennan ku ta bai studia afó. 

Hopi studiante despues di un aña na Hulanda, ta bai biba otro kaminda for di unda nan a yega den prome instancia. Esaki ta krea lugá pa esnan ku ta bai studia na Hulanda e aña siguiente. Pero e aña aki, a sosodé otro. Mayoria a keda kaminda nan ta. Pues nos mester a buska solushon i a haña esaki pa tur studiante nobo, tin lugá pa nan keda. Promé luna no ta bai tin skol ainda. Durante e promé luna, ta mas bien sosialisá ku e bida nobo i otro kosnan ku komo studiante bo tin ku bai dil kuné. 

Den Haag mas tantu hóben ta bai studia, pero tambe mas parti di Hulanda. E momentu aki ta poko doló pa mayornan, e ta poko fèrfelu, pero e yu a skohe pa un kaminda nobo.”

Promé paso

Nina den Heyer komo representante di OCW na Bonairu tambe a hiba palabra. “Hóbennan entusiasma, awe ta un dia poko difísil pa boso pero ta fuerte pa boso logra boso deseo. Awor aki boso ta bai studia, i wak pa bo mes kiko ta mihó. Nos kada un tin nos destino. Ta na nan si ta bini bèk Boneiru momentu nan kaba studia. OCW ta duna guia na TuranGoeloe. Awe ta promé paso den boso karera nobo”, asina Den Heyer a bisa. 

Den Heyer a hasi un apelashon tambe riba e studiantenan pa kòrda riba nan mayornan, ora nan tan a Hulanda. “Semper nan ke sa kon ta bai kubo  na Hulanda. Keda den kontakto ku famia apesar ku bo ta leu”.