KRALENDIJK- Djadumingu mainta por a nota hopi ánimo pa e evento di Swim to Klein Bonaire, kaminda hende ta landa di kosti di Boneiru pa Klein Bonaire.

Segun por a konta den purá un kantidat di masoménos 700 persona a presentá pa e evento deportivo, ounke mester bisa ku no tur hende ku tabata ta presente, a drenta awa tambe pa krusa laman. Den transkurso di aña por nota ku e evenemento aki ta birando mas i mas popular.

Esnan ku si a tira kabes pa kuminsá ku e paseo, a drenta awa nèt promé ku 9 ‘or di mainta. Kontrali na dianan anterior, por nota hopi solo i ya tambe tabata hasi kalor na momento ku e evento a kuminsá.