DEN HAAG – Hulanda ta bai inisiá e trayekto di lei pa deklará e Lei Trato Igual  aplikabel tambe den e parti Karibense di Hulanda. Minister Hanke Bruins Slot di Asuntunan Interior ta sigui e konseho di e komishon Thodé.

E ta bisa ku e introdukshon por traha komo un katalisadó pa e aseptashon di diversifikashon i trato igual riba e tres islanan, Boneiru, Saba i Sint Eustatius.

E komishon ta pidi tambe pa instituí pa kada isla BES un servisio anti-deskriminatorio, ku ta konsehá, duna informashon, duna ayudo i asistensia aksesibel na preguntanan di diskriminashon i alabes ta un punto di  kontakto.

Lokèt

E servisio mester tin un ofisina i un lokèt riba kada isla, ku ta haña respaldo di un ofisina na Hulanda. Segun e komishon e lokèt por bira parti di un lokèt hurídiko mas ámplio, ku ministerio di Hustisia i Seguridat ta preparando aktualmente na Den Haag.

Presupuesto di Asuntunan di Interior ta paga e gastunan di e totalidat strukturalmente. A pone tresshen mil euro disponibel. Ministerio di Hustisia i Seguridat a reservá te ku 2026 anualmente e mésun suma pa asistensia hurídiko primario ámplio i aksesibel i ta boga pa despues di 2026 pone fondonan struktural disponibel riba e presupuesto. 

Kolegio di derechonan humano lo mester evaluá e asuntunan ku ta bini dilanti na e lokèt ku mester di kontinuashon. E Kolegio ta e instansia ideal ku eksperensia riba e tereno di antidiskriminashon, tin outoridad, ta públiko i tin kaba un funshon investigativo riba e tres islanan, segun Bruins Slot. Lo pone dosshen mil euro struktural aserka pa esei.

Aruba, Kòrsou i Sint Maarten

E komishon a inkorporá den su relato final e yamada di Discriminatie.nl pa inisiá pa Aruba, Kòrsou i Sint Maarten tambe un forma di servisio anti-deskriminashon.

Pero e tres paisnan den reino ta segun Bruins Slot polítikamente outónomo i tin nan propio responsabilidat pa nan maneho di derechonan humano.