KRALENDIJK – Direktor di JICN, Wibo de Vries, huntu ku direktor di Strea Briante, Remsley Nita i direktor di Rayo di Solo, Jubella Balentin, lider di proyekto di JICN, Karel Martis i un maestro di trabou, Giovanni Saragoza riba djárason 12 di febrüari a entregá e promé sèntwichnan na e skolnan komo inisio di e proyekto “Desayuno na skol”. Den e proyekto aki 450 mucha ta haña un desayuno ku detenido ta prepará  4 bes pa siman pa entregá na e skolnan.

E skolnan a pidi JICN pa yuda nan ku e proyekto aki, ku tin komo meta pa duna alumno un komienso sano di dia. 

E departamento di salubridat públiko di OLB ta sostené e inisiativa aki. Un desayuno sano pa mucha ta importante pa motibu ku e ta mehorá salú i bienestar, i alabes e ta yud’é studia mihó. Ku esaki ta traha na oportunidat igual pa mucha, pa asina nan por partisipá optimalmente den nos komunidat.

Durante e ehekushon di e proyekto aki, siguridat ta primordial. Ta hasi e trabounan bou di supervishon di maestro eksperto den un ambiente estriktamente kontrolá. Solamente detenido ku ta apto pa hasi e trabou aki ta partisipá den e proyekto. Ta sigui e reglanan di higiena i siguridat di kuminda estriktamente, i ta realisá e transporte i e entrega di e desayunonan segun protokòlnan fiho. 

JICN ta orguyoso pa por duna un kontribushon balioso na nos komunidat pa medio di e proyekto aki, miéntras ku detenidonan ta uso signifikante pa nan tempu den e instituto.