KRALENDIJK – Riba e dia ku el a kibra e rèkòrt mundial di freediving Variable Weight, kampion mundial di freediving Alexey Molchanov a bishitá MBO Bonaire. Huntu ku e leyenda di freediving, Carlos Coste, nan a presentá e studiantenan di Deporte i Moveshon un desafio. E studiantenan mester a hasi un kaminata di 156 meter, sin hala rosea.

Riba tereno di Komunidat di skol di Boneiru tabatin un kabuya di 156 meter largu poné abou. Presis e kantidat di meter di e rèkòrt mundial nobo. E enkargo tabata pa kana mas leu posibel banda di e kabuya, ku rosea wantá aden. Asina e studiantenan por a eksperensiá kon difísil ta pa kubri 156 meter sin ku bo por hala rosea. Un pa un e studiantenan a bai e reto. Studiante Robbin Strauss a skor mihó ku 130 meter. Dosente Janny Tjalma tambe a tuma e reto. El a logra terminá e kaminata di 156 meter kompletamente ku rosea aden.

Durante e bishita Alexey i Carlos a konta historianan inspirativo tokante freediving i a mustra vários vidio. Studiante Shilah Benita tabata hopi impreshoná: ‘Ku asombro mi a skucha e eksperensianan ku freediving. Bo no por kere ku kuater ora promé ku e enkuentro akí el a kibra e rèkòrt mundial ku 156 meter!’

E studiantenan tabata sumamente honrá ku bishita di e kampionnan mundial.