KRALENDIJK – E siman aki, un kantidat rékòrt di boluntario a partisipá den Voorleesdag na Boneiru. En total, mas ku shentrinta persona a tuma mei ora di nan tempu di djaweps mainta pa lesa duro den klas.

Empleadonan di negoshinan i gobièrnu, ku hopi partiklar tambe, a tuma e esfuerso pa skohe un buki i bai na un skol. E aña aki, un grupo di studiante di MBO (Enseñansa Básiko Profesional) tambe a partisipá. Debí na e kantidat grandi di boluntario, tabatin oportunidat pa lesa no solamente na tur skol primario, pero tambe na otro luganan. 

Lesadónan a bishitá e personanan mayor na Cocari i tambe adultonan i muchanan ku un limitashon na FKPD na Rincon i Playa. 

Agradesido

Fundashon Lezen en Schrijven Bonaire ta gradisí tur hende ku a duna nan kontribushon sin interes, sperando ku e bon ehèmpel ta inspirá otro pa sigui.