KRALENDIJK- E kantidat di kontagio total na Boneiru a baha 21,3% den un siman di tempu. Aunke mester a warda hopi pa a mira al menos komienso di un bahada, por fin e sifranan total i kantidat di kontagio nobo pa día a kuminsá baha di forma konvisente. 

Pa loke ta trata e kantidat di kontagio nobo pa día, por bisa ku esaki ta varia hopi ainda di un día pa otro. Pero den su totalidat por mira un bahada, tambe pa loke ta trata infekshonnan nobo.

Booster

Mientrastantu a kuminsá tambe e siman aki pa pasa hende un di 3 angua ku e asina yamá ‘boostershot’ pa reinforsá e promé bakunanan. Hende ku ke pasa e boostershot mester ta kompletamente bakuná, kaminda ku e último angua no tin mag di ta mas resien ku seis luna pasá. 

Tambe ta pidi hendenan ku ke risibí e boostershot pa hasi un llamada na 0800-0900 pa traha sita pa pasa e angua nobo aki.