KRALENDIJK – Kolegio Ehekutivo di Bonaire ta sinti preokupashon tokante e situashon no muchu klaro ku a surgi rondó di e servisio di Air Ambulance na Fundashon Mariadal. Dia 24 di yanüari, e kontrato ku e operador bieu Medicair a kaba, i hospital a anunsiá un koperashon ku un partner nobo ku ta  Sarpa. 

Ounke e kompania kolombiano a keda introdusí ku bastante fanfar, ta resultá ku e kompañia no ta disponé di permitnan nesesario pa bula entre e islanan di anterior Antia Hulandes i Aruba. Sarpa su permit ta permití nan si pa hasi buelon entre Bonaire i Kolombia.

Sinembargo, mayoria di e buelonan di ambulans ta tuma lugá entre e islanan, i spesífikamente e islanan ABC. Algun tempu atras, Curaçao Civil Aviation Authority (CCAA) a komuniká ámbos na Sarpa ku nan Fundashon Mariadal, ku Sarpa no tin e derechonan pa bula entre e islanan. Pero riba diabièrnè e autoridat di aviashon di Aruba tambe a protestá fuertemente i a prohibí un avion di Sarpa di bula di Aruba pa Bonaire, aklarando ku e buelo aki no ta pas den e derechonan ku e kompania Kolombiano tin. 

Diputado Nina den Heyer a bisa durante konferensia di prensa riba djabièrnè ku Kolegio Ehekutivo no a keda informá dor di Fundashon Mariadal tokante e desishon pa terminá e koperashon ku e kompania lokal Medicair lokal, i ku nan a firma un kontrato ku un kompania djafó.

Preokupashonnan

Den reakshon riba pregunta di ABC Online Media, den Heyer a bisa ku ounke gobièrnu di Boneiru no ta karga responsabilidat pa esaki, nan ta preokupá pa ku e desaroyonan i e impakto ku e por tin pa suidadano, na momentu ku tin un kalamidat òf un kaso ku mester transportá un pashènt ku urgensia. E diputado a bisa tambe ku mientrastantu Kolegio Ehekutivo a manda un karta pa Fundashon Mariadal ku preguntanan pa informashon adishonal, i tambe un splikashon tokante desishonnan tumá pa gerensia di e hospital.

Investigashon

Pa motibu di e situashon ku Sarpa, ku kada biaha ta trata di hasi buelon pa Curaçao i Aruba sin e permitnan nesesario, outoridatnan di aviashon konhuntu a disidí pa start un investigashon ofisial tokante e insidente. Ehekushon di buelon entre e islanan di e anterior Antia Hulandes i Aruba ta reservá pa kompañianan di aviashon loke ku ta establesé riba un di e islanan, òf kompanianan Hulandes. Kompanianan djafó sinembargo no por ehekutá e buelona aki, sin ku nan a wòrdu ortogá un permit spesial. Director di CCAA, Peter Steinmetz, anteriormente a komuniká ku nan no tin ningun intenshon di duna e derecho aki na Sarpa, spesialmente tumando na kuenta ku tin kompañianan lokal ku por ehekutá e buelonan aki.

No tin klaridat

No tin klaridat kiko lo bai sosodé awor ku ta resultá ku avionnan di Sarpa no por hasi buelona di ambulans pa e islanan ruman. Den kaso di un situashon di emergensia òf kalamidat, por surgi e situashon ku -al ménos di parti di Fundashon Mariadal- no tin un avion di ambulans disponibel. Medicair entretantu a kontratá su mesun tripulashon médiko, i a ekipá su avionnan ku tur aparato médiko nesesario. “Nos, manera semper tabata e kaso, ta kla pa ehekutá buelonan di ambulans for di Boneiru i den region, pero no mas bou di un kontrato ku Mariadal,” asina direktor di Medicair René Winkel a bisa. E kompamia awor ta ofresiendo su servisionan di manera independiente, sin kordinashon òf intermediashon di Fundashon Mariadal.