DEN HAAG – Ku lantamentu di e Fundashon Komité di Konmemorashon Pasado di Sklabitut, gabinete a dal un paso importante den implementashon di e palabrashonnan relashoná ku pasado di sklabitut. 

E Komité di Konmemorashon ta haña un ròl sentral den e konmemorashon di pasado di sklabitut nashonal i den henter Reino i  pa promové konsientisashon sosial tokante esaki. Esei minister Uitermark (Asuntunan Interno i Relashonnan den Reino) ta skirbi awe den un karta na Tweede Kamer, na nòmber di minister di Asuntunan Eksterior i tambe minister di Enseñansa, Kultura i Siensia. 

E Komité di Konmemorashon ta konsistí di miembronan di diferente parti di Reino.  Ku pasamentu di e akta e miembronan proponé ta e promé miembronan di e komité. Nan ta: Sra. Astrid Elburg (presidente, proponé di parti di minister di asuntunan interno), Sr. Nolly Oleana (proponé di parti di Boneiru), Sr. Shamil Ortega (proponé di parti di Kòrsou), Sra. Clara Reyes (proponé di parti di Sint Maarten), Sr. Raimie. Richardson (proponé di parti di Sint Eustatius), Sr. Dimetri Whitfield (proponé di parti di Saba) i Sra. Lilian. Callender (proponé di parti di NiNsee). Adishon di representantenan di Aruba i Sürnam ta den preparashon.

E Komité di Konmemorashon ta organisá entrante e aña akí e Konmemorashon Pasado di Sklabitut Nashonal riba promé di yüli na Amsterdam i den esaki ta traha den estrecho kolaborashon ku NiNsee (Instituto Nashonal Pasado di Sklabitut i Patrimonio Hulandes). E komité ta traha komo fundashon independiente, sin influensia polítiko. Esaki ta garantisá un aserkamentu inklusivo, den kua tin espasio pa diferente perspektiva i inisiativa.

Diálogo

E komité lo hunga un ròl importante tambe den e diálogo ku lo sigui tokante pasado di sklabitut i stimulashon di proyekto- i inisiativanan ku ta investigá e pasado akí.