ORANJESTAD – E sentensia resien di Korte Arubano di Rafael Zambrano i Juan Carlos (Toro) Rodriguez a fiha atenshon riba e mundu peligroso i kompliká di kontrabanda di oro entre Venezuela i Aruba. E kaso aki, konosí komo kaso-‘Alpina’, ta duna un bista den e métodonan ku kontrabandistanan ta uza pa trasladá oro ilegal i laba plaka. 

Riba 9 di febrüari 2018 a detené Rafael Zambrano na aeropuerto di Aruba ku 46 bara di oro den su ekipahe, ku un peso total di 55 kilo. E tabata na kaminda pa Hulanda, ku destinashon final Dubai. Investigashon a indiká ku e oro tabata prosedente di Venezuela.

Na promé instante a apsolvé Zambramo i su kómplise Rodriguez pa falta di prueba, pero den korte di apelashon a sentensiá nan pa falsifikashon i labamentu di plaka. Korte a imponé kastigu di respektiva 113 dia i seis luna. A konfiská e baranan di oro, ku un balor balotá na mas ku ocho mion florin Arubano i ta bini awor pa Pais Aruba despues ku e sentensia bira irevokabel.

E rutanan di kontrabanda i e métodonan

Venezuela, ku ta riku na rekursonan natural, tabatin e último añanan un oumento di eksplotashon i komèrsio ilegal di oro. Kontrabandistanan ta hasi uzo di e serkania geográfiko di Aruba i Kòrsou pa saka e oro for di e pais. E islanan aki ta solamente algun desena di kilometer for di kosta di Venezuela, loke ta hasi nan atraktivo pa rutanan di tránsito direkshon di entre otro Estados Uní di Merka, Emiratos Árabe Uní, Bélgika i Suisa.

Un método hopi uzá ta transportashon di oro via buelonan komersial. Kontrabandistanan ta purba di kamuflá e oro komo karga legal, hopi biaha ku ayudo di dokumentunan falsifiká ku ta disimulá e orígen di e oro. Den sierto kaso ta dirti e oro i bash’é di nobo pa difikultá su detekshon. Tambe ta uza zonanan liber riba e islanan pa etiketá e oro di nobo, di manera ku ta skonde e orígen Venezolano i ta pasa e oro di tránsito komo legal.  

E Kaso

Rafael Zambrano, ku a yega Aruba for di Venezuela na luna di febrüari 2018 ku 46 bara di oro, a haña e dokumentunan numa despues ku aduana a inspekshoná e karga. Lo a transportá e oro via Hulanda pa Dubai. Segun e wesnan por papia di un patronchi kaminda e hòmber tabata transportá oro mas biaha, sin kontrakt i riba base di konfiansa. E dokumentunan tabata kontené informashon inkorekto di orígen di e oro.

For di investigashon a sali na kla ku e sospechoso tabata forma parti di un ret mas ámplio ku tabata tira kontrabanda di oro via un kadena di empresanan fantasma i intermediarionan. Tabata transportá e baranan di oro sin papelnan ofisial for di Venezuela, kaminda nan tabata prosedente di eksplotashon di mina ilegal. E sospechoso tabata biaha pa Aruba ku e oro, kaminda einan numa tabata regla e dokumentunan nesesario. E dokumentunan aki sinembargo tabata kontené informashon engañoso, manera menshon ku e oro lo tabata prosedente di Aruba of Hulanda, mientras en realidat e ta bini di Venezuela.

E 55.900 gram di oro ku e sospechoso tabata transportá na e momentu di transporte tabatin un balor di merkado balorá na mas ku nuebe mion florin.

Moda di funshoná

E moda di funshoná di e ret tabata remarkabel. Na lugá di transportenan di oro tradishonal, ku siguridat pisá, mensaheronan individual tabata transportá e metal presioso manual. E sospechoso a deklará ku e tabata traha a base di akuerdonan verbal i nunka a haña un kontrato por eskrito. Via Whatsapp e tabata haña instrukshon di su dunadó di enkargo i intermediarionan tabata pagu’é kèsh na Dubai. Tabata traha e faktura- i deklarashonnan nan ku e tabata biaha kuné despues, sin  niun indikashon di e fuente real di e oro.

E investigashon a sigui mustra ku e empresa enbolbí, ku tabata sirbi komo pretekso tabata eksistí solamente riba papel. A resultá ku e adrèsnan di empresa tabata depósitonan bashí i no por a haña kontabilidat ofisial òf datonan di suministradó. Ámtenarnan di aduana tabatin kòntrol limitá di e transakshonnan, pasobra e sistema ku a uza tabata duna outorisashon outomátikamente pa e dokumentunan ku a suministrá sin verifikashon mas leu.

Defensa 

Durante e kaso e defensa a argumentá ku pa años e transporte tabata tuma lugá ku aprobashon di aduana Arubano i ku e sospechoso tabata aktua di buena fe. Korte a rechazá e argumento i a mustra ku e sospechoso tabata sa of mester tabatin sospecho ku e oro tabata prosedente di delito. Ku a saka e oro for di Venezuela sin pèrmit di eksportashon i ku ta na Aruba numa tabata traha e papelnan, a hunga un ròl importante den e sentensia.

Banda di e kastigu di prizòn a konfiská e baranan di oro. Korte no tabata por a disidí riba un arma ku bala ku tambe a konfiská. Pa motibu di tardansa den prosedimentu hurídiko a redusí e kastigu.