KRALENDIJK- Djabièrnè atardi Mental Health Caribbean (MHC) a presentá ‘Un kashi yen’ – e buki pa mucha tokante emoshon i trouma – na públiko. “Un éksito grandi”, según sikólogo di GZ Marielle Hoekstra, ku den un forma fasinante tabata sa di hinka e muchanan den e storia di un mama ku ta luchando ku keho mental pa motibu di trouma di den pasado.

Ku vários karchi di emoshon el a mustra e diferente emoshonnan ku ta bini dilanti den e buki i un pianista, kende a sa di duna sonido na e sintimentunan ei, a kompañ’é den su presentashon. A base di e sonidonan di e piano, e muchanan mester a konektá i nombra un emoshon. Den e interakshon ku e presentenan tabatin espasio tambe pa nan ekspresá nan propio sintimentunan (fastioso), ku metafórikamente ta yena nan propio kashi.

E eksperto di eksperensia Lena, ku a forma un parti importante den realisashon di e vershon karibense di ‘Un kashi yen’ a papia tokante su propio situashon i kon el a sigui un trayekto di tratamentu sikológiko serka Hoekstra. Huntu ku Hoekstra el a duna splikashon tokante e metáfora ‘un kashi yen’ i importansia di papia tokante emoshon i eksperensia desagradabel (troumátiko). A lesa tambe for di e buki.

Balioso

Krista Oplaat, sekretario di direktiva na MHC, ku huntu ku ‘TOP Bonaire’ a sa di konbertí e buki i pon’é den konteksto kultural di Boneiru, ta wak bèk ku satisfakshon. “Pero ta di importansia pa sigui papia tokante e temanan akí i pa hendenan bai lesa e buki.” 

Por fia ‘Un kashi yen’ na biblioteka. ‘Buki manera esaki ta un añadidura balioso na nos kolekshon”, segun Jennifer Pocornie-Martis, miembro di e grupo di trabou Desaroyo Biblioteka Boneiru, ku ta brasa inisiativanan i kolaborashonnan manera esaki. “Esaki ta kuadra ku e karakter sosial di Biblioteka Públiko Boneiru.”