KRALENDIJK – Djaluna Fundashon Mariadal a manda un karta pa Kolegio Ehekutivo di Entidat Públiko Bonaire (OLB), ku algun informashon ku Kolegio Ehekutivo (BC) a pidi en kuanto enbolbimentu di un kompania aéreo eksterior komo Operadó di Air Ambulance. Tambe ta pidi BC yudansa den solushoná e situashon ku a presentá.

Siman pasá kolegio ehekutivo a ekspresá su preukupashon pa loke ta trata notisia den entre otro media, ku Sarpa di Colombia lo no ta disponé di e pèrmitnan apropiá pa por ehersé e buelonan entre e islanan un ku otro. E protokòl ku ta bálido entre e paisnan di Reino – pero tame entre Kòrsou i Colombia – ta reservá e asina yamá buelonan cabotage pa kompanianan di aviashon lokal. E echo ku ta trata buelonan na benefisio di Air Ambulance no ta kita nada, ya komo ku Sarpa ta funshoná gewon komo un empresa komersial.

Den e karta di djaluna, ku a bai pa prensa tambe, ta resaltá un diskrepansia grandi entre e ‘echonan’ manera Fundashon Mariadal a deskribí i echonan ku ta bini dilanti den tantísimo otro dokumento, ku entre otro ABC Online Media a tira bista aden. Asina por ehèmpel Mariadal ta hasi menshon di ‘miles di buelo’ ku Sarpa lo a realisá kaba entre e isanan, sin ku nunka outoridatnan di aviashon lokal a oponé kontra. Konosedónan di e materia ta yama e presentashon di e situashon aktual poko akseptabel.

Tambe Mariadal ta enfatisá den su karta un biaha mas ku Sarpa lo ta disponé di ‘tur pèrmit nesesario’. Algu ku tantu Curaçao Civil Aviation Authority (CCAA) komo Department of Civil Aviation Aruba (DCA) ta desmentí.

Den su karta di djaluna Mariadal ta reprochá e diferente outoridatnan di aviashon fuertemente. “Den 17 aña (kaminda Sarpa lo a bula segun Mariadal sin ningun opheshon entre e islanan, redakshon) CCAA, DC-ANSP i otro outoridat òf instansha enbolbí nunka a keda sin duna e pèrmit nesesario pa buelonan interinsular òf a ekspresá algun opheshon kontra realisashon di algun mil buelo di ambulans di Sarpa internashonal i interinsular di òf pa e parti Karibense di nos Reino i/òf entre e islanan CAS-BES individual. Pues ta inkomprendibel pakiko ta nenga Sarpa e pèrmit awor”, segun e karta di Mariadal.

Petishon pa ayudo

Den su karta Fundashon Mariadal ta hasi un yamada riba gezaghebber Nolly Oleana pa yuda e organisashon.

“Mi ta hasi un  apelashon insistente riba abo komo Gezaghebber interino di Boneiru i riba bo Kolegio Ehekutivo pa desaprobá públikamente den  ekspreshonnan mas severo posibel e situashon aki  i apoyá FM na tur manera den nos intentonan pa sigurá seguridat i kontinuidat di nos servisio di ambulans na benefisio di habitantenan di Boneiru, Saba i Sint Eustatius mas lihé ku ta posibel”, director general di Fundashon Mariadal Giovannie Frans ta skirbi.

E petishon pa ayudo di Mariadal na kolegio ehekutivo ta remarkabel, pasobra e organisashon no a informá kolegio ehekutivo nunka tokante e transishon planiá di Operadó di Air Ambulans, ni e no a enbolbí e Kolegio na ningun manera òf hasi’é sosio.