KRALENDIJK – Riba un manera trankilo Fundashon Mariadal a selebrá dia di enfermera riba djaluna.

Esaki debí na e pèrdida di zùster Annie Thode. Anicella ‘Annie’ Thode, algun dia pasá a fayesé, despues di un periodo kòrtiku di malesa.
Sigur un zùster ku a nifiká hopi pa su trabou. Fin di e aña aki, e mester a baha ku penshon, pero dios a yam’e promé ku e tempu. Un persona ku tabata e guia i motor tras di aktividatnan na kas di kuido Fundashon Mariadal. E tabata organisá nan ku amor i hopi ánimo, loke semper tabata notabel.

Ehèmpel

Sigur e meresé atenshon, pa loke el a hasi pa su trabou, un ehèmpel pa otronan sigui kuné. Riba un pantaya na entrada di hospital Fundashon Mariadal, tabatin un potrèt di zuster Annie. Diferente persona tabata pasa pa saka un potrèt di e potrèt, ekspresá nan emoshon ku fayesementu di zùster Annie.