KRALENDIJK- Ku un paseo riba boto MBO Boneiru a selebrá ku porfin a bira posibel pa sigui siña pa kòki (Zelfstandig werkend kok) riba nivel 3 den nos idioma papiamentu. 

Un kambio di lei a hasi esaki posibel entrante e di dos mitar di aña 2022. MBO Boneiru a hasi bon uso di e kambio di lei i a desaroyá e estudio nobo estilo di ‘traha i siña’. E boto a nabegá pasa na vários restorant. E restorantnan a risibí un regalo simbóliko pa na un manera festivo hala atenshon riba e logro akí. E regalo tabata yená ku foyeto di e estudio pa parti pa e empleadonan. Ku un poesia un biaha mas a para ketu na e echo ku hopi aña largu a lucha pa por logra esaki.

Riba e boto tabatin un delegashon di MBO Boneiru i ROA CN presente, huntu ku 2 eks studiante di e estudio pa kòki nivel 2 i Nina den Heyer, hefe di departamento di Enseñansa, Kultura i Siensia di RCN. E boto a mara promé na Buddy Dive i despues a sigui nabegá bai Divi Flamingo i Plaza Beach & Dive Resort.

Oportunidat

Nina den Heyer a deklará ku studiantenan ku ántes no tabata bini na remarke, awor akí ta haña oportunidat pa un bunita futuro: ‘Pa e grupo spesífiko akí idioma sigur no tin mag di ta un opstákulo pa por finalisá nan estudio pa asina partisipá den un forma kompleto riba nos merkado laboral lokal.’ 

Liset de Keijzer, direktor di unidat di MBO ta agregá: ‘Inisio di nos estudio ku guia vokashonal pa kòki ta demasiado importante pa profeshonalisashon di nos empresanan di hóreka i e ta alabes un tremendo oportunidat pa studiantenan ku ke desaroyá nan mes mas aleu. Un kambio di lei kompliká tabata nesesario pa por ofresé e estudio akí na papiamentu. Nos ta kontentu ku nos a logra!’.