KRALENDIJK – MBO Bonaire ta agregá dos estudio nobo na su kuríkulo den e aña eskolar benidero 2023-2024: ‘Mekániko básiko di vehíkulo i ekipo móbil’ (nivel 2) i ‘Mekániko integral di vehíkulo i ekipo móbil’ (nivel 3).

A desaroyá e estudionan den estrecho koperashon ku e tan renombrá Summa College na Hulanda. E siman aki Roel Akkerman, direktor di enseñansa, i dosente John van de Ven a bishitá Boneiru pa desaroyá huntu ku e tim di enseñansa di Komunidat di Skolnan na Boneiru un bunita kurso ku ta pas ku deseonan di e isla.

Huntu ku direktor di ROA CN, Elyane Nicolaas i konsehero Fernon Estanista a bishitá diferente empresa den e sektor di mobilidat na Boneiru, entre kua Cicilia Motors, Garashi Cordia, Napa Autoparts, Autocity, Scooters Bonaire, Fundashon Mariadal i Center Body Car Polo. Durante e bishitanan aki a diskutí posibilidatnan di stazje i deseonan pa formashon den e sektor aki.

Despues e tim a bai implementá huntu ku e dosentenan i e lider di tim di MBO Boneiru  e deseonan di e empresanan den un kuríkulo edukativo i desafiante teniendo kuenta ku e posibilidatnan lokal. E estudionan nobo lo pone atenshon tambe na desaroyonan riba tereno di outo eléktriko, vehíkulo di dos wil, ekipo móbil i e sektor marítimo.

Roel Akkerman ta kontentu ku e resultado di e kòmbersashonnan ku e empresanan: “Nos a haña un bon bista di e deseonan di e empresanan i mirando e desaroyonan di e parke di vehíkulo na Boneiru, e komienso di e estudio nobo di Téknika di Outo ta nèt na tempu!”

Liset de Keijzer, director interino di unidat di MBO Boneiru, tambe ta entusiasmá ku e koperashon ku Summa College: “Nos ta sumamente kontentu ku e mihó skol pa Téknika di Outo ke fungi awor komo sosio di MBO Boneiru. Nan konosementu i eksperensia ta di balor enorme pa komienso di e estudio nobo aki!”

Pa mas informashon di e estudionan nobo di Téknika di Outo por subi www.mbobonaire.com