KRALENDIJK – Na kaminda pa e festivo 35 aniversario di Dia di Rincon, Maduro & Curiel’s Bank huntu ku FORMA i AKSESO a tene un seshon informativo na Cocari día 18 di aprel último na Rincon. E seshon aki tabata speshalmente pa nos grandinan i tabata kompletamente gratis.

Durante e seshon aki, empleadonan di MCB a duna informashon detayá tokante servisionan bankario digital i a demostrá kon ta hasi uzo di e servisionan. A mustra e grandinan kon ta hasi uzo di un karchi Bankomatiko, un mashin di ‘ATM’, un mashin di pago elektróniko (POS Machine) i tambe Online Banking Personal.

Mas aleu a splika e benefisionan di e servisionan digital. Kliente ta mas seif pasobra no mester kana ku sèn kèsh mas, i kliente tin akseso na su sèn 24 ora pa día; ki ora ku e ke, tur día ku e ke i rònt mundu.

Bishitantenan a risibí tambe tep balioso di seguridat i kon por uza e sistemanan digital pa manehá finansas pèrsonal. Ku hopi kariño MCB a trese e informashon importante aki pa nos grandinan na Rincon. Pronto lo sigui tambe den otro barionan di Boneiru.