KRALENDIJK – Maduro & Curiel’s Bank ta orguyoso di e hóbennan Boneriano ku a destaká internashonalmente durante aña 2024, den nan ramo di deporte. Ta hopi atmirabel kon e deportistanan hóben aki ta praktiká deporte banda di nan estudio i bida diario, i logra presta fenomenalmente riba nivel internashonal. 

Pa stimulá e hobennan pa nan sigui sobresalí i duna e bon ehèmpel, tur aña MCB ta duna nan un rekonosementu meresí. Dia 20 i 22 di yanüari, MCB a tene un enkuentro ameno ku e hobennan ku a keda premiá internashonalmente den diferente deporte, i a opsekiá nan un bòn di regalo pa un sena na restorant. Además, kada hóben a risibi un regalito personal di MCB. MCB ta hasi tambe un donashon na e organisashon di deporte ku e hobennan ta pertenesé na dje, pa sostené e deporte en general. 

Ku e gesto aki, MCB ke enkurashá nos hóbennan pa sigui presta i saka kara di nos isla, i ta spera di asina kontribuí na un komunidat fuerte i positivo.