MIAMI – Despues di un fin di siman tenso i intensivo tantu Tim Boneiru U14 komo Tim Boneiru U16 a gana plata na Carifta Polo Akúatiko 2023. Un delegashon grandi tabata presente na Miami den representashon di Boneiru.

Tabata un fin di siman di plata pa Boneiru. Amado Vrieswijk tambe a gana un medaya di plata pa ‘Windfoilen’ pa Boneiru. No ta Vrieswijk so a gana plata, sino dos selekshon hubenil tambe di Boneiru a gana dos biaha un medaya di plata.

Dos tim nashonal hubenil ku Aquatics Federation Bonaire a selektá por a sobresalí na Miami. E deportistanan ta hunga normalmente pa e klup di landa i polo akúatiko Bonaire Barracudas na Boneiru.

Partisipashon internashonal

Banda di e timnan nashonal hubenil di Bahamas, Kòrsou, Trinidad & Tobago i Barbados, diferente tim di polo akúatiko Merikano tambe a partisipá na e torneo. Ku e torneo aki Boneiru a demostrá ku e por mantené su mes bon riba pia mei mei di e nivel haltu di polo akúatiko di e timnan aki.