KRALENDIJK- Komo konsekuensia di un infekshon grave ku un bakteria strèptokòk grupo A a okashoná, un mucha chikí a bin fayesé na kuminsamentu di e siman akí. 

E bakteria di strèptokòk no tan obo na Boneiru pero solamente den kasonan eksepshonal esaki por kondusí na un infekshon grave. Den e mesun famia tin dos persona mas a keda kontagiá ku un infekshon grave komo konsekuensia di e kontaminashon. A interná e personanan akí den hòspital. 

E strèptokòk grupo A ta un bakteria ku ta haña hopi serka hende sin ku nan tin molèster di dje, pero e por okashoná diferente infekshon tambe. Mayoria di e infekshonnan no ta grave. Kasi tur mucha a yega di haña un infekshon ku strèptokòk grupo A (por ehèmpel impetigo na kara (krentenbaard), inflamashon den garganta òf plèki kòrá. Hopi hende ta haña e bakteria pa un tempu kòrtiku sin ku nan mes ta bira malu. E bakteria ta prinsipalmente den nanishi, den garganta òf riba kueru. Ora ku tosa, nister i papia, drùpelnan chikitu ku e bakteria ta drenta den aire, i asina por plama e bakteria riba hende. Pa medio di laba man hopi biaha ku awa i habon, pero tambe pa medio di tosa i nister den èlebog òf den un lensu di papel i tira esaki afó mesora, por prevení plamamentu di e bakteria akí.

Síntoma

Hendenan ku bira malu di e bakteria, hopi biaha tin keho leve manera doló di garganta, kalafriu, kentura, rebultashon di kueru òf doló di múskulo serka hende adulto, pero serka mucha tin ora ta aparesé plèki riba kueru tambe. Den kasonan raro un hende por haña un infekshon grave komo konsekuensia di e bakteria akí. Esaki ta dependé di e bakteria, pero tambe di salú di e persona ku tin e infekshon. Hende ku tin un resistensia abou, tin mas chèns pa haña un infekshon grave. Un infekshon grave komo konsekuensia di e bakteria akí por ta hopi difísil pa trata. Den kaso ku bo tin keho manera menshoná akí riba, e ora ei bo por tuma kontakto ku bo dòkter di kas.

Investigando

Den koperashon ku hòspital, departamento di Salubridat Públiko ta investigá ken ta e hendenan ku tabatin kontakto intensivo ku e mucha ku a keda kontagiá i a haña e infekshon grave. Ta tèst e hendenan akí riba e bakteria akí i si ta nesesario ta trata nan tambe segun instrukshonnan ku ta konta pa esaki. Pa esaki departamento di Salubridat Públiko tin konsulta ku RIVM na Hulanda. Departamento di Salubridat Públiko ta den kontakto ku e dòkternan di kas i tambe e skol i akohida pa mucha enbolbí. Pa mas informashon por tira un bista riba e visual den anekso òf bishita https://lci.rivm.nl/faq/groep-streptokokken