KRALENDIJK –  Den un karta hopi largu pa Kolegio Ehekutivo fin di siman ku a pasa, e direktor general di Fundashon Mariadal, Giovannie Frans, ta tira kulpa pa e problemanan ku e pèrmitnan di Ambulans Aéreo serka outoridatnan di aviashon lokal. E ta referí entre otro na Curaçao Civil Aviation Authority (CCAA) i DC-ANSP ku ‘diripiente i sin previo aviso’ lo a prohibí e buelonan di Sarpa ei.

“Lagami ta bon kla: Sarpa tin tur pèrmit i outorisashon ku outoridatnan ta eksigí pa bula pa e islanan CAS-BES, tambe pa buelonan interinsular – aloménos te ku resien, ora ku despues di 17 aña a hala nan aden sin niun aviso, manera mi lo splika aki ratu ainda”, segun Frans. Ku esaki Frans ta desmentí kategorikamente  ku e outoridatnan di aviashon enbolbí lo a avis’é. Si bai segun dokumentonan ku ABC Online Media ta disponé di dje, a avisá en todo kaso dos biaha konkretamente,  un biaha den aña 2020 i un biaha ku fecha di 23 di mart 2023.

Rapòrt

Den un dokumento fechá 18 di mart 2020 pa kolmo ku e título ‘Rapport in opdracht van Fundashon Mariadal’, skirbí pa anterior direktor CCAA, Hans de Jong, tin e siguiente pará: “Pa determiná si por ehèmpel ta pèrmití un operashon spesial di un kompania di aviashon di Colombia riba e ruta Colombia – Boneiru – Kòrsou, lo mester kontrolá e operashon ei tantu riba akuerdonan bilateral di Hulanda (inkluso BES) ku Colombia komo e akuerdonan di Kòrsou ku Colombia”.

Despues di un eksplorashon di e kaso Sarpa spesífiko, De Jong ta yega na e siguiente konklushon: “Manera for di loke a antesedé ta resultá, ku ta pa motibu di e limitashonnan for di lei i reglanan manera deskribí ariba no ta posibel pa laga kompanianan di aviashon ku no ta registrá riba un di e islanan BES hasi buelonan médiko, otro ta ku bou di sirkunstansianan spesífiko, pa kua, loke a sosodé kaba den práktika, ta otorgá un pèrmit temporal”. Ku su remarke De Jong ta referí na e pèrmit temporal di e areglo stand-by ku a kumbiní durante e krísis di COVID-19 pa motibu di situashonnan eksepshonal. 

Karta 

E raport di De Jong no ta pará riba su so. Den un karta di 23 di mart 2023 ku e referensia CURCW/23/215 i firmá pa e direktor di CCAA Peter Steinmetz, ku komo tópiko ‚Cabotagerechten Sarpa‘, spesífikamente dirigí na Frans, bo por lesa entre otro: „Lamentablemente mi no por trata bo petishon, ya ku pa medio di tratadonan di aviashon a otorgá e asina yamá derechonan di transporte na kompanianan di aviashon i no na otro hende. Ta p’esei ta e kompania di aviashon  – den e kaso aki – mester pidi pa derechonan di cabotage entre e paisnan di Reino“. 

Den e di dos alinia di su karta, Steinmetz ta reakshoná riba e kaso SARPA: „Den e kaso di SARPA e akuerdonan bilateral entre Kòrsou i Colombia ta aplikabel, kaminda a kumbiní eksplísitamente ku kompanianan di aviashon Colombiano no mag ehersé derechonan di transporte komersial entre Kòrsou i, entre otro, e parti Karibense di Hulanda.

Ponensia 

Den kuadro di e informashonnan aki ta difísil pa komprondé a base di kiko Frans ta pretendé ku nunka a spièrta ni Mariadal, ni SARPA, pa e echo ku e buelonan di e kompania Colombiano, basá riba lei i reglanan eksistente i tambe diferente protokòlnan, no por ta posibel.  Ademas no ta kla basá riba kiko e ta di opinion ku por papia di un ‘diripiente’, òf aktua ‘sin previo aviso’ di outoridatnan enbolbí.