KRALENDIJK – Fin di aña pasá direktiva di Fundashon Alzheimer Bonaire a sera un akuerdo di koperashon ku Theater Veder Nederland pa ofresé un online-training  di 3 dia for di Veder Methode, kua treinen ta inovativo pa kuido na Boneiru.

Señora Westra (direktor di Veder i fundadó di Veder Methode) a bishitá Boneiru na 2019 i a tuma kontakto ku Fundashon Alzheimer Bonaire i na 2021 un di e entrenadónan tabata na Boneiru pa konsulta. Asina direktiva a sera konosí ku un método den kua kontakto mutuo ta para sentral. Pa motibu ku e método ta universal, nos ta konbensí ku traspaso lo tin un balor agregá tantu pa plaser di trabou di e kolaboradónankomo pabienestar di e habitantenan. 

Djamars mainta 22 di mart pa 9.30 e promé treinen a start ku masha entusiasmo i interes i ku lo sigui dia 12 di aprel i dia 23 di mei ku e trajekto pa e promé parti di aña, na Fundashon Mariadal Academy, ku seis partisipante loke ta e máksimo permití. Tres partisipante ta di Zorg en Welzijn Groep, dos di Fundashon Kuido pa Personanan Desabilita (FKPD) i un di Kas di Kuido/Fundashon Mariadal. E institutonan mes ta karga ku e gastunan.

Fundashon Alzheimer Bonaire ta sumamente kontentu i orguyoso di por a hasi posibel pa e personal di kuido di nos institutonan di kuido na Boneiru por a partisipá komo promé den e parti Karibense di Reino i Surnam na e onlinetraining spesial akí.

Den e  trajekto di di dos parti di aña, ta turno pa seis otro partisipante di e mes organisashonnan di kuido/institutonan. Direktiva ta deseá partisipantenan i dunadónan di trabou éksito i ku esnan den nesesidat di kuido na Boneiru lo saka probecho for di Veder Methode.

Riba e potrèt partisipantenan na inisio di e promé online-training.