KRALENDIJK – Diasabra a tuma lugá pintamentu riba muraya di TELBO. Diferente skol básiko, a haña invitashon pa e muchanan pinta riba sierto área di e murayanan di TELBO.   

Den afan pa duna edifisio di TELBO un kara nobo, TELBO a organisá un dia di pintamentu na e edifisio. No solamente e muchanan, sinembargo maestranan di e skol tambe por a demostrá nan kreatividat pa medio di un pintura ku e tópiko “TELBO ta Di’Bo”.

E pintura mester tin elementonan karakterístiko di Boneiru, por ehèmpel: flamingo, turtuga, serunan di salu i mas. Hopi mucha a partisipá i den nan ansha pa pinta i keda kla ku loke nan a plania pa pinta, nan man tambe a risibí poko fèrf.

Na komienso di aña eskolar 2022-2023, TELBO ta eksponé e pinturanan ku keda pintá dia 25 di yüni 2022 online, di manera ku komunidat por skohe e pintura i skol ganador. Skolnan ku a partisipá ta:Kristu Bon Wardado, Aquamarin, Pelikaan, Kolegio San Bernardo, Kolegio San Luis Beltran i Skol Amplio Papa Cornes.

Riba potrèt un momentu ku e pintamentu riba muraya di TELBO a tuma lugá, djasabra durante dia.