KRALENDIJK – Resientemente, fotógrafo Fittipaldi Pietersz, a duna un presentashon kòrtiku di lès di fotografia, na un grupo di mucha. 

Ta trata di un proyekto ku e skol a hasi den kuadro di nan 5 aña den e konsepto nobo. Fittipaldi a pasa un proseso di preparashon algun luna pasá, serka Segni Bernadina, kende ta kordinadó di e proyekto pa Plataforma Kultural. E preparashon tabata, siña kon pa duna lès na mucha na skol, lès básiko di kitara, kuarta, ukalele i fotografia. 

Awor Fittipaldi tin e preparashon i e programa, kon pa siña e muchanan, e parti básiko di algun instrumènt i fotografia. Siman pasá, un grupo di muchanan di Integraal Kind Centrum (IKC), e skol na Rinkon, a haña splikashon, kiko ta un kámara profeshonal i kon e ta funshoná. Despues ku nan a haña un splikashon i nan a práktika ku e kámara, nan tabatin e oportunidat pa saka potrèt, un pa otro i na final wak kon e potrèt a sali. Muchanan a haña e lès interesante i nan tin deseo pa por kontinuá. 

Kámara

Ta trata di un kámara DSLR, ku ta rekerí konosementu pa domin’é i hasi uzo di dje. Pa Fittipaldi e proyekto tabata un eksperensia nobo, pero na su pareser, loke ta meta di Segni, e proyekto di Plataforma Kultural, sigur ta kontribuí na mas desaroyo di e mucha, ku e meta pa aparte di lèsnan di skol, tambe siña otro kos, amplia nan konosementu. 

“E idea ta amplio i no solamente músika òf fotografia”, Fittipaldi ta bisa. Potrètnan ta saká pa e muchanan, ku edat ta varia entre 8 pa 12, esta mucha, ku ya ta dominá un kámara asina spesial.