DEN HAAG – Kabinete Hulandes tin intenshon pa oumentá entrante 2027 e impuesto di buelo pa buelonan di distansia largu konsiderablemente. Ku e medida aki gobièrnu ta spera di generá 248 mion euro èkstra na entradanan di impuesto. Ounke ta menshoná un redukshon di emishon di CO2 komo ophetivo adishonal, e ophetivo primario ta oumentá e entradanan di estado.

Manera ta premirá e medida lo tin konsekuensianan grandi pa buelonan pa e parti Karibense di Reino. Pa habitantenan di e isla tráfiko aéreo pa Hulanda no ta un luho, pero un nesesidat. E oumento di preis di pasashi ta menasá di hasi biahenan pa Hulanda mas difísil, loke por tin konsekuensianan ekonómiko i ta hasi bishita na famia, skol i kontaktonan di negoshi mas fastioso.

Konsultamentu 

Riba e website di gobièrnu a habri un konsultamentu kaminda siudadanonan por duna nan opinion tokante e medida proyektá. For di e islanan ta sali e gritu pa haña un posishon eksepshonal, manera Fransia tin tambe ku su teritorionan ultramar. E argumentonan pa esaki ta entre otro e kontribushon limitá di e rutanan di Karibe na e ingreso total di impuesto i e posibel daño ekonómiko pa e islanan.

Banda di esei e preisnan di pasashi ta subi kaba pa motibu di otro obligashonnan, manera inkorporashon di kombustibel sostenibel i kompensashonnan di CO2. Aktualmente ta reakshonando den e konsultamentu partikularmente for di Hulanda Europeo, mientras apénas ta eksponé e konsekuensianan pa e partinan Karibense di Reino. 

P’esei ta hasi un yamada riba e habitantenan di e islanan pa laga tende nan bos i ekspresá nan preukupashonnan via e konsultamentu na  Overheid.nl.