THE BOTTOM – Saba Cares, huntu ku Kuido i Hubentut Hulanda Karibense (ZJCN) a finalisá un proyekto piloto di 3 luna pa baha e tempu di espera pa dermatologia. 

E dòkter di kas ta konsultá ku un dermatólogo online, di manera ku ta posibel pa e spesialista por duna un konseho rápido for di un distansia. E dòkter di kas por disidí e ora ei mihó pa kua malesa ta nesesario pa manda un persona pa e dermatólogo di Sint Maarten Medical Center (SMMC) i kua e mes por trata. Saba Cares i ZJCN ta kontentu ku e resultado positivo di e proyekto piloto akí.  

Na Saba pashèntnan no tin un dermatólogo standart na disposishon. Un bia den 4 siman un dermatólogo di Sint Maarten ta bin Saba pa konsulta i pashèntnan ta bai SMMC pa tratamentu, pero e tempu di espera a subi. Pa evitá e problema akí a investigá e opshon pa hasi uso di konsulta digital. Esaki ta nifiká ku un dermatólogo digital por konsehá dòkternan di kas i pa medio di pòtrèt di pashèntnan por hasi un evaluashon for di un distansia. Di e manera akí e dòkternan di kas ta haña akseso rápido i efisiente na ekspertisio riba tereno di kuido di kueru.

Un total di 3 dòkter di kas na Saba Cares i un dermatólogo for di distansia a interkambiá petishonnan pa konsulta ku otro pa medio di un plataforma digital. Despues di 3 luna a evaluá esaki, kaminda a registrá sifranan tokante tipo di malesa di kueru, kantidat di pashènt ku a keda yudá digitalmente i si e tempu di espera pa e dermatólogo ku ta bin di bishita a baha. 

Evaluashon 

Judith Meijer, direktor di Saba Cares: “Saba Cares ta sumamente satisfecho ku e posibilidat nobo akí pa haña klaridat rápido pa nos pashèntnan. Di e 29 konsultanan digital, den 4 kaso e dòkter di kas na Saba a kita tehido i den 1 kaso a referí pa e dermatólogo den SMMC. Ta bon ku tin klaridat rápido pa pashèntnan preokupá.”

E resultadonan ta positivo i e proyekto piloto a demostrá ku dòkternan di kas na Saba di e manera akí, por haña ekspertisio di e di dos liña  mas rápido i mas fásil. E dòkternan di kas i e dermatólogo ta eksperensiá e kooperashon komo agradabel i signifikativo i tur partido tabata di opinion ku e proyekto piloto tabata un éksito. 

Entretantu ZJCN lo bai introdusí e konsultanan dermatológiko digital akí pa medio di un proyekto piloto na Sint Eustatius i Boneiru tambe, pa aya tambe por yuda aseguradonan ku malesanan di kueru, mas rápido i mas fásil.