KRALENDIJK—Real Rincon pa di 5 aña konsekutivo a bai ku e premio máksimo di e organisashon Federashon Futbol Boneriano (FFB). 

Stadion Antonio Trenidat, tabata yen yen di hende djabièrnè anochi pa presensiá e partido entre Real Rincon i S.V. Atletico Flamingo. E torneo tabata dediká na Alipio Goeloe. Promé gol di e anochi tabata anotá pa un hungadó di Real Rincon i despues Flamingu a hinka e gol di empate. 

Den e di 2 mitar Real a bai dilanti ku un gol mas i e wega a terminá 2 pa 1, na fabor di e ekipo di Real Rincon. Diputado James Kroon a presensia e wega kompletu i na final a hasi entrega di trofeo na ganadónan e anochi. E konosido rèfri Chalton Thomas, a tuma retiru komo rèfri e anochi. El a flùit e promé 10 minit di e partido pa despues duna mando na un otro rèfri. Otro persona ku a tuma retiru e anochi tabata konosido Ibi ‘Panchita’ Pikerie. E tabata kabesante di rèfrinan. 

Mihó gol

Durante e wega di e ekiponan menshoná, e mihó gol di e anochi tabata pa Jurick Seinpaal di Flamingo.