DEN HAAG – E aktividatnan di karnaval riba e diferente islanan no a kondusí na un oumento visibel den e kantidat di kasonan di COVID. Esei RIVM ta informá den su relato di luna di islanan Karibense.

Luna pasá e kantidat di resultado di tèst positivo den e área Karibense di Reino Hulandes a baha konsiderablemente kompará ku e luna anterior: di 216 a bai 89 kaso.

E kantidat di hospitalisashon relatá ku COVID-19 tambe a baha. Na luna di febrüari a hospitalisá na tur 16 pahènt riba tur isla huntu, kontra 27 na luna di yanüari. E sifra di mortalidat relatá na COVID-19 a keda abou tantu na yanüari komo na febrüari, ménos ku sinku.

Kòrsou

Na Kòrsou a hasi menshon na luna di febrüari di ocho resultado di tèst positivo i ménos ku sinku hospitalisashon. Niun persona a muri di e infekshon.

E kantidat di resultado di tèst positivo tabata hopi mas abou ku na luna di yanüari (45). E kantidat di hospitalisashon nobo relatá ku COVID-19 a baha kompará ku luna di yanüari, ora ainda a hasi menshon di seis kaso.

Den e último siman di febrüari un riba 100.000 persona a haña un resultado di tèst positivo i e positividat di tèst tabata 0,7 porshento. Ta tèst hopi ménos riba e isla kompará ku den fin di aña.

Aruba

Na Aruba a hasi menshon na luna di febrüari di 61 resultado di tèst positivo i djestres hospitalisashon. A konta ménos ku sinku kaso di morto relashoná ku COVID-19. Esaki ta kasi mitar di e kantidat ku a menshoná na luna di yanüari (117).

Den e último siman di febrüari ocho riba 100.000 habitante a haña un resultado di tèst positivo i e positividat di tèst tabata ocho porshento.

Sint Maarten

Na Sint Maarten a hasi menshon di ménos ku sinku resultado di tèst positivo i hospitalisashon. Ningun persona a muri di COVID.

E kantidat di resultado di tèst positivo a baha kompará ku luna di yanüari (14). Na Sint Maarten tambe ménos persona a tèst: na luna di febrüari a hasi 75 tèst mientras ku na luna di yanüari e kantidat tabata 180.

Den e penúltimo siman di febrüari tres di kada 100.000 habitante a haña un resultado di tèst positivo i e positividat di tèst tabata 7,7 porshento.

Islanan BES

Na Boneiru a hasi menshon di djessinku infekshon na luna di febrüari. Riba e isla aki tambe e kasonan ta hopi ménos ku na luna di yanüari (38). E kantidat di hospitalisashon i morto relashoná ku COVID ya pa basta tempu ta abou. Na luna di febrüari no a hasi menshon di hospitalisashon nobo òf morto.

Den e último siman di luna di febrüari djesocho riba 100.000 habitante a haña un resultado di tèst positivo i e positividat di tèst tabata 22 porshento. Na Sint Eustatius no tabatin resultado di tèst positivo na luna di yanüari i febrüari 2023. Na Saba a hasi menshon di ménos ku sinku resultado di tèst positivo i na luna di yanüari tambe tabatin ménos ku sinku. Riba ámbos isla no tabatin menshon di hospitalisashon i morto relashoná ku COVID na 2023.